Heyetêka PAKî roja 30.10.2021î de şîy qezaya Sêrtî Misirc Cemîl Taşkesen ziyaret kerd.

Mîyanê Heyeta PAKî de rayber û endamê PAKî yê Sêrtî û Batmanî (Êlih) estbî.

Endamê Meclîsa PAKî M.Salih Kiliçaslan, Aziz Özdemir, rayberê PAKî Tahir Birlik, Abdurrahman İnan, Hamdullah Toprak roja 30.10.2021ê  semedo ke hetkarî bide Cemîl Taşkesen şîy Misirc û seba helwest û vatişanê ey yê welatperwerane Cemîl Taşkesen pîroz kerd, ey rê sipas kerd û hetkarîya xo pêşkêş kerd.

Cemîl Taşkesen bi germinîyêka welatperwerane ame heyeta PAKî vera.

Bitikne: PAK: Ma tepişyayîşê Cemil Taşkesen o ke vatbi ‘tîya Kurdistan o’ şermezar kenê

Wexto ke heyeta PAKî zîyaretîya Cemîl Taşkesenî de bî, Serekê Pêroyî yê PAKî Mustafa Özçelik bi telefon Cemîl Taşkesen pîroz kerd.

Mustafa Özçelikî va ‘’Kekê Cemîl to çîyê ke zerrîya şarê me de bî îfade kerdî. To gamêka tarîxî eşte. Ma bi vîr û bawerî û hîsanê xo yê Kurd û Kurdistanî hetê to de yê. ‘’.

Cemîl Taşkesenî zî seba zîyaretê heyeta PAKî û seba hetkarîyye spasîya PAKî kerd û va ‘’Ma pîya xurt ê. Ez hêzê xo şima Kurdistanîyan ra gêna’’.

Sereka Pêroyî ya İyi Partî Meral Akşener roja 28.10.2021 de qezaya Sêrtî Misirc (Kurtalan) de esnafî ziyaret kerdbî.

Demê zîyaretî de esnafo bi nameyê Cemil Taşkesenî Meral Akşener rê wina vatbi ‘’Ziwanê ma, nasnameyê ma yo Kurdî yene înkar kerdene. Tîya Kurdistan o. Meclîsa Tirkîya de Kurdistan yeno înkar kerdene’’.

Nê vatişanê Cemîl Taşkesenî ser o Serdozgerîya Cimhûrîyetî ya Kurtalanî bi îthamê ’‘propagandaya rêxistina terorî kerdo’’ derheqê Cemîl Taşkesenî de tehqîqat da dest pêkerdene û Cemîl Taşkesen hetê polîsan ra ameyo destbend kerdene. Cemîl Taşkesen vera polîsan de zî gama xo peyser nêeşte û vatişê xo reyna vatî. Girewtişê îfadeyê ey ra dima serbest ame veradayîş. Beno ke derheqê Cemîl Taşkesenî de dewa bêra akerdene.

30.10.2021

Buroya Çapemenî û Têkilîye ya PAKî