XEBERE RÛPELA NÛ

Heyeta Partîya Azadîya Kurdistanî (PAK) Dîyarbekir de beşdarê abîyayîşê Weşanxaneyê ‘VATE’yî bîy. Merasîmê abîyayîşê cayê ‘VATE’yî de deyîrbazî deyrî vatî, şîîrî ameyî wendiş û ame waştiş ke wa kirdî (zazayî)  wayîrê ziwanê xo vejîyê.

Cayê  "VATE"yî ewro Dîyarbekir de bi merasîmêk ame akerdene. Abîyayîşê cayê ‘VATE’yî seba heskerdoxanê edebîyatê kirdkî (zazakî) gamêka muhîme ya û na game bîya sebebê keyfweşîye.

Heto bîn ra Hetkarê Serekê Pêroyî yê PAKî Saîd Aydogmuş û Endamê Meclîsa Partî yê PAKî M. Alî Yilmaz zî beşdarê merasîmê abîyayîşê PAKî bîyî.

Heyeta PAKî xo reyde vilî zî berdî merasîm û kesê ke bîyê wesîleya na xebate ê pîroz kerdî.

Heyeta PAKî seba abîyayîşê merasîmî va: Grûba Xebate Ya Vateyî û Weşanxaneyê Vateyî hetanî nika seba ziwanê ma xebatê ercîyayey kerdê. Ma na keda înan vera hurmet nîşan danî û înan pîroz kenî. Her çiqas zî ziwanê ma ser o polîtîkayê asîmîlasyonî estbê zî tayn bo zî bi nê xebetan vernîya asîmîlasyonî yena girewtene. Kesê ke mîyanê na xebate ca gênê û desteg danê ci ma bi zerrî ra înan pîroz kenî û ma do nika ra tepîya zî her tewir hetkarîye bide înan.

Merasîmê abîyayîşî de Deyîrbaz Kerem Sevîncî çend deyrî vatî. Nuştox û Endamê Grûba Xebate Ya Vateyî Mehmûd Nêşiteyî zî derheqê xebata vateyî de qiseykerdişêk kerd.

Dima ra zî deyîrbazî Ercan û Çinare bi deyranê xo meymanî keyfweş kerdî.

Weşanxaneyê Vateyî bi serrano ke kirdkî (zazakî) ser o xebate keno û hetanî nika hetê weşanxaneyî ra 61 reye Kovare bi nameyê Kovara Vateyî weşan bîya.

Bê na kovare hetanî nika hetê weşanxaneyî ra xeylê kitabê kirdkî (zazakî) weşan bîyê.

Weşanxane hetanî nika ziwanê ma rê xizmetêko pîl kerdo. Bi sayê Weşanxaneyî Vateyî û Grûba Xebate Ya Vateyî bi seyan kesî eleqeyê xo dayê ziwanê nuştekî ser û feydeyê nê weşanxaneyî û Grûba Xebate Ya Vateyî ziwanê ma rê zaf pîl o.

Weşanxaneyî Vateyî nika zî Amed de cayêko newe akerd. Bi akerdişê cayê Weşanxaneyê Vateyî êdî wendoxê kirdkî eşkenî bi rehetî xo biresnê weşananê kirdkî û înan temîn bikerî.