PAK (Partîya Azadîya Kurdistanî), PSK(Partîya Sosyalîst a Kurdistanî), TDK-TEVGER(Tevgera Demokratîk a Kurdistanî), mabênê rojanê 15 û 16ê sibatê 2022î de Amed de Baroya Amedî, DTSO û DİTAMî reyde pêvînayîş kerdî.

Hetkarê Serekê Pêroyî yê PAKî Vahît Abayî derheqê pêvînayîşan de tay malûmatî dayî Rûpela Nû.

Vahit Abayî va ‘’Ma sey PAK, PSK, TDK-TEVGERê bi şîarê ‘Semedo ke rayîrê vernîya çareserîya meseleyê Kurd û Kurdistanî abibo, BÊNÊ MA WAŞTIŞANÊ ACÎLAN SER O HÊZÊ XO BIKE YEW!’  xebatêke daya dest pêkerde. Armancê na xebate zî ser Programê Waştişanê Acîlan, bi potansîyelê tewr hîra yê Kurdan reyde awankerdişê TEREFÊ KURDΠ yo. Badê ke TEREFÊ KURDΠ ame awankerdene, ma wazenê ser nê waştişanê acîlan, bi potansîyelê tewr hîra yê  Tirkîya reyde zî  dîyalogan bide dest pêkerdene,  hemkarîyan bike. Pêvînayîşê ma yê bi Baroya Amedî, DTSO û DİTAMî reyde zî sey destpêkê na xebate yo’’.

Goreyê zanayîşê ke resayê destê Rûpela nû, Roja 15.02.2022î heyetêka ke Mesûlê TDK-TEVGERî M.Can Azabay, Hetkarê Serekê Pêroyî yê PSKyî Hasan Dagtekîn, Hetkarê Serekê Pêroyîî yê PAKî Vahît Aba mîyan de bî, Baroya Amedî ziyaret kerd.

Serekê Baroya Amedî Nahît Eren û îdarekarê Baroya Amedî ameyî heyeta PAK, PSK, TDK-TEVGERî vera.

Roja 16.02.2022 zî heyeta ke Hetkarê Serekê Pêroyî yê PSKyî Bayram Bozyel, Hetkarê Serekê Pêroyî yê PAKî Nûrûllah Tîmûr, Mesûlê TDK-TEVGERî M.Can Azabay mîyan de bî, DTSOyî (Odeya Bazirganî û Pîşezasîyê ya Amedî)  ziyaret kerd.

Serekê DTSOyî Mehmet Kaya  û îdarekarê DTSOyî ameyî heyeta PAK, PSK, TDK-TEVGERî vera.

Roja 16.02.2022yî zî heyeta ke mîyan de Hetkarê Serekê Pêroyî yê PAKî Vahît Aba , Mesûlê TDK-TEVGERî M.Can Azabay, Endamê Meclîsa Partîye  ya PSKyî Zulkuf Baran estbî, DİTAMî (Navenda Lêkolînên Civakî ya Dîyarbekirê) zîyaret kerd.

Serekê DİTAMî Mehmet Vûral  û îdarekarê DİTAMî ameyî heyeta PAK, PSK, TDK-TEVGERî vera.

Hetkarê Serekê Pêroyîî yê PAKî Vahît Aba vano ‘’Me sey heyetê PAK, PSK, TDK-TEVGERî nê pêvînayîşan de,  pêşniyarîyê xo yê nuştekî yê derheqê Programê Waştişanê Acîlan yê miletê Kurd de pêşkêşê Baroya Amedî, DTSO û DİTAMî kerd ûînan rê va ’Ma wazenê pêşniyarîyanê şima zî derheqê muhtewaya nê waştişanê acîlan de bigîre û ma pîya, ser nê waştişanê acîlan de,  bi rayîrê aştîyane, bi potansîyelê tewr hîra yê Kurdan TEREFÊ KURDΠ awan bike. Badê ke TEREFÊ KURDÎ ame awankerdene, ma wazenê sernê waştişanê acîlan, bi heme hetanê Tirkîya reyde zî  dîyalogan bide dest pêkerdene, wertaxîyan bike’’.

Derheqê helwestê her hîrê dezgehan de zî Vahit Abayî va ‘’Rayberîya Baroya Amedî , îdarekarê DTSOyî û îdarekarê DİTAMî nê pêvînayîşan de, bi hawayêko hewl ewnîyay pêşniyarîyê ma  yê  derheqê Programê Waştişanê Acîl yê miletê Kurd’’.

Vahit Abayî va ‘’Pêvînayîşê PAK, PSK, TDK-TEVGERî yê bi nê armancî do pa dezgehê sivîl û dezgehê meslekî, kesayetê kurd û partî û tevgerê Kurd û Kurdistanî do zaf bajaranê Kurdistanî û Tirkîya de dewam bikê. Badê nê pêvînayîşan ma do netîceyanê nê pêvînayîşan ser o vinde û gorê ci ma do rayîrêk bewlî bike.’’

Rûpela Nû/Amed