Piştî aloziyên wan çend rojên dawiyê yên li ser sînorê navbera Rojavayê Kurdistanê û Tirkiyê, hêzên Amerîkayê li ser sînorê navbera herdu aliyan belav bûne û dest bi çavdêrîkirina sînor kirine.

 

Artêşa Tirkiyê ji heftiya bihorî ve dest bi topbarankirina çend gund û deverên sînorî yên ser bi Kobanî û Girê Sipî kiriye, ku di encamê de heta niha 4 şervanên YPGê û keçeke 6 salî ya bi navê Sara Mistefa canê xwe ji dest dane.

 

Piştî daxwazên HSDê û Rêveberiya Xweser ji Amerîkayê û Hevpeymaniya Navdewletî ji bo ku helwesteke aşkere û zelal li hember êrîşên wê dawiyê yên Tirkiyê bo ser deverên di bin desthilatdariya Rêveberiya Xweser de nîşan bidin, îro hêzên Amerîkayê li aliyê sînorê Dirbêsiyê û Serê Kaniyê gihîştin ser sînorê navbera Rojavayê Kurdistanê û Tirkiyê.

 

Herwiha hêzeke HSDê û YPGê jî bi hêzên amerîkî re bûn û bi hev re rewşa li ser sînorê Dirbêsiyê û Serê Kaniyê şopandin û çavdêriya sînor kirin.