Terteleyê Dêrsimî ra wextêkî dima 'surgunî' agêrayî erdê xo ser. Zelîha Polat zî agêraye welat û wayîra erdê xo vejîyaye. Hîkayeya Zelîha Polat sey fîlmêkî ameye girewtene. Fîlm do Swîsre de bêro mojnayene.

Terteleyê Dêrsimî yê 1937-38î têna sey 'tertele' nêmend. Tertele ra dima xeylêk welatperwerê Dêrsimî ameybî surgunkerdene. Erd û herra welatperweran ameybî vilakerdene. Wexto ke surgunî agêrayî Dêrsim înan dî ke erdê dadî, babî, pîrik, laj, kêna û birayanê ci hînî ê înan nîyê. 

Nê surgunan ra yew zî torna Seyîd Rizayî Zelîha Polat a. Seyîd Rizayî û 11 embazê ci Terteleyê Dêrsimî de  ameybî dardekerdene.

Zelîha Polat serra 2000î de metropolan ra agêraye herêma eşîra xo û warê Axdadî de ca bîye. Zelîha Polat agêraye û wayîra erdê xo vejîyaye. Zelîha Polat Axdad de xo rê kulubeyêke viraşte û tede manena.  Hîkayeya wayîrvejîyayîşî ya Zelîha Polat hetê dîrektora swîsreyîje Gabriela Gyr ra ameye fîlmkerdene.

Gabriela Gyr derheqê dêrsimijan de wina qisey kerd: ''Mi waşt ke ez cuya dêrsimîjan bimojna Ewropa. Coka mi no proje viraşt. Heyf ke ma nêeşkê fîlm fînanse bikerê. Dêrsim de serra 2016î ra dima tedaya sîyasîye zêdîyaye. Coka ma neçare mendî ke xebata xo vindarnê.

Wisarê 2018î de mi sekansê Zelîha seyr kerdî. Mi waşt ez na hîkaye bikera fîlmêk. Zelîha cinîyêka geş û bicoş a. Mi waşt a hîkayeya xo ma rê vaja. Çunke hîkayeya aye mîsalê pêro ê kesanê ke welatê xo ra bi zorî ameyê qerifnayene. Zelîha red kerd ke welatê xo biterikna û bi nê hawayî 'xohûrmetêk' awan kerd. Xo bi xo kulubeyêk viraşt. Na kulube bîye manîfestoyê aye. ''

Muzîkê fîlmî hetê Mîkaîl Aslanî ra virazîyayî. Fîlm nika Swîsre de yeno mojnayene.

Zanayîşê derheqê fîlmî de; https://www.zelihashuette.com