Heyet Tahrîr el Şam ku ji El Nûsra û 8 rêxistinên din ên cîhadîst pêk tê, di derbarê rêkeftina Tirkiye û Rûsyayê ya li ser Idlibê daxuyaniyek belav kir û ragihand ku ew wan deverên di destê xwe de radestî rejîma Sûriyê nakin, çekên xwe na deynin û heta dawiyê dê şerê rejîma Sûriyê bikin.

Di daxuyaniyê de hat gotin ku ew ê ‘cîhad’ a xwe heta dawiyê bimeşînin û hat gotin ku ji ber gotûbêj û îstîşareyên wan ên li gel komên Bakûrê Sûriyê wan daxuyaniya xwe dereng belav kirine û wiha hat gotin, “divê rejîm bê rûxandin, girtiyên di zîndanên rejîmê de bên berdan û koçber hemû vegerin cihên xwe”.

HTŞê di daxuyaniya xwe de red kir ku ew ê çekan deynin û xwe weke, ‘parastvanên mafên Sunneyan’ pênase kir û di derbarê çekdarên biyanî de jî got, ‘em ji wan in û ew jî ji me”.

HTŞ got ku ew pesnê hewldanên siyasî yên ji bo bergiriya Idlibê didin û got ku artêşa Sûriyê di hewlên xwe yên hatina bo Idlibê bi ser nakeve.