Di daxuyaniyekê de, Rêxistina Human Rights Watch diyar kir, ku pêwîst e lêkolîn li ser çar êrîşên ezmanî û bejahî yên Tirkiyê bê kirin, ku di çend mehên derbasbûyî de, li sînorên Herêma Kurdistanê li dijî PKKê hatine kirin û di encamê de, heft welatiyên sivîl canê xwe jidest dane û welatiyek birîndar bûye.

Human Rights Watch tekez kir, ku ew corên êrîşan ji armancên serbazî dûr in û yasayên cengê binpê dikin.

Rêvebira Beşê Rojhilata Navîn di wê rêxistinê de, Lema Feqîh daxwaz ji Tirkiyê kir, ku di encamdana êrîşên xwe de, hemû amadekariyan bike û xwe ji ziyangihandina xelkên sivîl dûr bike.

Herwiha Lema Feqîh got: Pêwîst e Hikûmeta Tirkiyê lêkolînê li ser wan êrîşên neyasayî bike, ku ziyan li welatiyên sivîl kirine û wan kesan siza bide ku êrîş encam dane û yasa binpê kirine û wan malbatan qerebû bike, ku ji encama êrîşan ziyan dîtine.