Kovara Psyche Mezgî, hetê gûbêka mamosteyan û psîkologan ra Îstanbûl de yena hedrekerdiş.

Hûmara verêne ya Psyche Mezgî 21ê Sibate ya Roja Ziwanê Dayîke ya Dinya de ame weşanîyayîş. Hûmara dîyine ya kovare no hefte vejîyaye. Na hûmare de kovare derheqê Psîkolojî û Perwerdeyê Taybetî ser o hem ca da nuşteyanê neweyan hem zî babetê hûmara verêne ser o ca da nuşteyanê neweyan.

Kirmanckî de kovara psîkoloyî ya verêne

Kovara Psyche Mezgî Kirmanckî de kovara psîkolojî ya verên a. Hûmara verêne de Otîzm ser o nuşteyî ca girewtibî. Hûmara dîyine de reyna Otîzm ser o nuşteyî ca girewtê. Heto bîn ra babetê neweyî yê sey ‘Astengîya Musayîşî û Dîsleksî’yî babetê neweyî îlawe bîyê. Her hûmare de do Otîzmî ser o nuşteyî ca bigerê û nê nuşteyî ke ameyê pêser do sey kitabî bêrê çapkerdiş. Kovare de meqaleya ke derdeqê tesîranê Covîdî de ya, Îngîlîzkî ra ameya açarnayîş. Reyna na kovare de bi bîyografîya Montessorîyî babeta verdibistanî zî ca girewta. Hûmare bi roportajêk bîya temame.