Navenda Nûçeyan- Rewşan, bi şîroveya xwe ya taybet û bi albûma xwe ya yekemîn 'Ax Lê Wesê' bala guhdaran kişandibû, niha jî bi albûma xwe ya duyemîn TOV, koleksîyoneke cûda diafirîne.

Di vê albûma nû de cih bi rewşenbîr û hunermendên kurd ên navdar ên weke, Kamuran Elî Bedirxan, Fêrikê Ûsiv û Aram Tigran û herwiha bestekarên weke Ahmet Kaya û Mirady tê de cih digirin û bi vê yekê jî awazeke nû ya Progresîf Folk hatîye avakirin.

Derhênerîya muzîk û aranjeyên albûmê ji alîyê Hakan Gurbuz ve hatîye çêkirin. Gurbuz li ser albûmê û armanca wê dibêje, “Dema li dinyayê festîvalên mûzîkê çêdibin, stranbêjekê dibe ku we mest bike; ne hewce ye hûn ji zimanê wê/wî fêhm bikin... Gerdûnîya mûzikê jî qey ne ev e? Em jî weke mûjîkjenên ku xwedî hezaran cure melodî ji axa wî şîn dibin, divê bikaribin di van festîval û qadên navnetewî de bi mûzika xwe ve beşdar bibin.”

Ew albûm, bi amûrên kevneşopî û modern ve hatîye sazkirin, cureya albûmê Progresif Folk e (muzîka gel ku ji bo pêşveçûnê guncav e) û ew di kategorîya 'Muzika Dinyayê' tê hesibandin.

Di albûma Tov de 10 stranên Kurmancî cih digirin. Yek ji taybetmendîya vê albûmê ew e ku, Rewşan cara yekemîn stranên xwe jî parve dike. Herwiha ev albûm, roja Înîyê, 10ê Çileya 2020, li ser hemû platformên dîjîtal û marketên muzîkê cihê xwe digire. Konsera yekemîn a danasîna Tovê, dê 29ê vê mehê li Moda Sahne ya Stenbolê bê kirin.

Hunermend Rewşan li navçeya Tetwan a Bedlîsa Bakurê Kurdistanê ji dayîk bûye. Beşa Şêwirmendîya Derûnî ya Zanîngeha Enqerê temam kirîye. Mastera xwe jî di warê Lîstîkvanîyê de li Zanîngeha Bahçeşehîrê pêk anî.