Merkezê Xeberan- Grûba ke ewro Rehmetî Tahîr Elçî yo ke 4 serrî verî Amed de binê Mirnareya Çarlinge de amebi qetilkerdiş yad kerd verê Adlîyeya Dîyarbekirî de amey pêser. Grûba qelebalixe dima ra heta Minareya Çarlinge rayşîyayîş kerd. Vernîya Minareya Çarlinge de seba Tahîr Elçî qiseykeridşî amê akerdiş û qetlbîyayîşê Tahîr Elçî ame şermezarkerdiş. Grûbe dima ra şîy mezelê rehmetî Tahir Elçi û mezelê ey ser o qerenfîl nayê ro.

Îdarekar û endamê Partîya Azadîya Kurdistanî (PAK) zî ewro (28.11.2019) Amed de beşdarê çalakîya yadkerdişê welatperwero Kurd, Serekê Baroya Amedî Tahir Elçi bîy. Heyeta PAKî mezelê Tahîr Elçî ser de namê PAKî ser o cinîya Turkan Elçî rê serweşîye waşt û qetlbîyayîşê ey şermezar kerd.

Hetkarê Serekê Pêroyî yê PAKî Nurullah Timur, Endamê Komîteya Îdarekare yê PAKî Hanifi Turan, Mehmet Ali Yılmaz, Endamê Meclîsa PAKî Abdullah Polat, Mehmet Dörtyama, û xeylê endamê PAKî  çalakîya yadkerdişê Tahîr Elçî de pîya rayşîyayîş kerd, beşdarê çalakîyan bîyî.