Hêzanê Asayîşê Zereyî yê HSD yî seba şiknayîşê tesîrê DAÎŞî yê kampê Hol bi nameyê 'Operasyonê Asayîşî û Merdimîye' hemleyêk da destpêkerdene. Armancê operasyonî kampan de qedînayîşê DAÎŞî yo.

Hêzanê Asayîşê Zereyî yê Rojawanî Kampê Holî de bi nameyê 'Operasyonê Asayîşî û Merdimîye' operasyonêk da destpêkerdene. 

Vervatoxê Hêzanê Sûrîyeya Demokratîke (HSD) Gabrîel Kîno, Vervatoxê Yewînanê Pawitişê Şarî (YPG) Nûrî Mehmûd û Endama Fermandarîya Pêroyî ya Meclîsê Herêma Cizîre Evînar Dêrik pîya beyanat day çapemenî. Beyanat hetê Vervatoxê Hêzanê Asayîşê Zereyî Elî El Hesenî ra ame wendene.

Beyanat de wîna vajîya :

''Şerê Sûrîye 10 serrîyo ke dewam keno. Nê şerî de bi hezaran merdimî merdî û bêçare mendî ke erdanê xo ra koç bikê.

2 serrî verî HSDyî pê hetkarîya Koalîsyonê Mîyanneteweyî, DAÎŞ hetê cografya ra çine kerd. Labelê DAÎŞ hema zî vera şarê herême û dinya tehlukeyêko pîl o. Hucreyê DAÎŞî hema zî Rojawan de sivîlî û îdarekaran kenê hedef. Sey Hêzanê Asayîşê Zereyî ma HSDyî reyde şerê vera DAÎŞî  domnenê.

Na rewşe de Kampê Holî wextêkê dergî ra nata herême ser o tehlukeyêko pîl bi. Kampî de tewr tay 60 hezar kesî manenê û mîyanê înan de xeylê domanî estê. Nê kesî terefgîr û keyeyê DAÎŞî yê ke xo rê îdareyêko taybet awan kerd û bi no qayde  DAÎŞ pawenê. Nînan tîmê El-Hesbî (polîsê DAÎŞî) û mehkemeyî nayî ro, domanan rê pê zorî materyelanê DAÎŞî musnenê. Bi no qayde  dinya rê tehdîdêko newe peyda beno. Ganî nê domanî bêrê xelisnayene.

Îdareyo Xoser ê Rojawanî pêro hewcedarîyanê kampe goreyê îmkananê xo peyda keno, rêxistinê mîyanneteweyî paştî danê kamp. La Kampê Holî  vurîyayo merkezê DAÎŞî. Sivîlê kampî kişîyenê û benê hedef. DAÎŞî emser têna 47 kesî kamp de kiştî.

Ewro Hêzê Asayîşê Zereyî pê destekê HSD, YPG û YPJyî KampÊ HolÎ de seba çinkerdişê DAÎŞî bi nameyê 'Operasyonê Merdimîye û Asayîşî' hemleyêk danê destpêkerdene. ma do na hemle de pêro tedbîran bigêrê û kamp û şêlikê  kampe belayê DAÎŞî ra bixelisnê.''