Merkezê Xeberan- Goreyê Dezgehê Çimdarîya Heqanê Merdiman ê Sûrîye şewa çarşemeyî û pancşemeyî de şerêko giran qewimîya û tewr tay 39 kesî merdî.

Ame parekerdene ke rejîm û mutefîqanê ci di dewî kontrol kerdî û ver bi şaristanê Maaet el Numanê stratejîkî şinê.

Rejîmê Şamî qerardar o ke Idlîb bigêro. Na herême de koalîsyonê cerganê El Nûsra yê Heyet Tahrîr El Şamî serdest o. Dewleta tirke paştî dana nê cergan.

Moskovaya ke paştdayoxo tewr pîl ê rejîmî yo 9ê çeleyî de Idlîb de adirbirnayîş îlan kerdbi û Tirkîyaya ke paştî dana cergan na xebere tesdîq kerdbi.

Dezgehê Çimdarîye da zanayene ke roja çarşemeyî teyarayanê Sûrîye û Rûsya tewr tay 100 reyî hêrişê herêma Idlîbî kerd.

Goreyê buroyê koordînasyonê karanê merdiman ê Neteweyanê Yewbîyayeyan 1ê kanûna 2019î ra heta nika Idlîb de tewr tay 350 hezar kesî warê xo ra bîyî.

Goreyê bîlançoya peyîne ya Dezgehê Çimdarîye Adara 2011î destpêkerdişê şerê zereyî ra nata 115 hezarê ci  sivîlî 380 hezar kesî merdî. Bi mîlyonan kesî zî mecbur mendî ke koç bikerê.