Serkirdeya PYDê, Îlham Ehmed, ku hevseroka Meclisa Sûrîya Demokratîk e jî û niha li Amerîka ye, ji kovara Amerîkî ya Foreign Policy re gotiye, ew ji liv û tevgerên artêşa Tirkîyê li ser sînorên Rojava û Sûrîyê nîgeran in.

Îlham Ehmed her wiha gotîye, ruxmî ku kurdan bendên rêkeftina “herêma ewle” bicîh anîne jî lê dîsa Tirkiye roj bi roj gef û tehdîdên xwe li ser wan zêdetir dike. Amerîka jî bi temamî piştevanîya kurdan nake loma Tirkîye kengê bixwaze dikare êriş bike.

Li ser daxuyanîya serokê Tirkîyê ya bicîhkirina 3 milyon penaberên Sûrî li Rojavayê Kurdistanê û rojhilatê Firatê jî, wê serkirdeya Rojavayê Kurdistanê gotîye, ji xwe piranîya wan kesan ne xelkê bakûrê Sûrîyê ne ji ber wê jî eger li wir bên bicîhkirin kurd dê neçar bimînin koçber bibin.

Bi gotina Îlham Ehmed, her gava ji her du alîyên sînor, hêzên serbazî vekişîyan wê çaxê ew dikarin bêjin kirîz çareser bûye û rewş normal bûye.

Basnews