Netîceya tedayanê dîplomatîkan ê Amerîka de Îran Komîsyonê Cinîyan ê Neteweyanê Yewbîyayeyan (NY) ra ame vetene.

Konseya Ekonomî û Komelî yê NYyî (ECOSOC) kombîyayîşê xo yê bînaya xo ya New Yorkî de rayî dayî ke wa Îran Komîsyonê Cinîyan ê NYyî (CSW) ra bi 'lezî' bêro vetene.

Kombîyayîş de 26 reyê 'he', 16 rayê 'ney' û 8 rayê 'bêterefî' ameyî dayene. Şêwirmendê Asayîşê Neteweyî yê Qesra Sipîye Jake Sullivanî vat: ''No raydayîşêko tarîxî yo ke seba cewabdayîşê zorbazîya sîstematîke ya vera cinîyanê Îranî yeno kerdene.''

Mutefîqê Amerîka Brîtanya de Wezîrê Karanê Teberî James Cleverly bire selam kerde û vat: ''Rejîmêko ke cinî û kênayanê Îranî bi hawayêkê barbarî dano kişte, komîsyon de cayê ci çin o.''

Rêxistina Heqanê Merdiman (HRW) cewabê NYyî rexne kerd. HRWyî da zanayene ke ganî komelo mîyanneteweyî 'tedaya bi koordîne ya lezgîne' bikero ke Îran de şîdet biqedo û mesuldarê şîdetî bêrê muhakemekerdene.

Dima ke 16ê êlule de cinîya kurde Jîna Emînî amebî qetilkerdene Îran û Rojhelatê Kurdîstanî de serewedaritişê şarî dewam keno