Îran û Rojhelatê Kurdîstanî de rixmê hêrişanê hêzanê dewlete zî çalakîyî dewam kenê. Derheqê hezar kesanê ke ameybî tepiştene de zî îdîaname ame amadekerdene.

Qetilkerdişê cinîya kurde Jîna Emînî ra nata Îran û Rojhelatê Kurdîstanî de çalakîyî dewam kenê. Çalakîyî 200 şaristanan rê vila bîyê . Rojanê peyênan de bi taybetî çalakîyê wendekaran dewam kenê.

Zanîngehê Sine yê Rojhelatî de wendekaran vizêr rixmê hêrişanê hêzanê rejîmî zî çalakîyan rê dewam kerd. Meriwan de wendekaran portesto kerd, Seqiz de ciwanan kuçeyan de adir vist ra.Şino de seba roja 40. ya qetilkerdişê 3 kesan dikanî ameyî girewtene, çalakîyî ameyî kerdene. Pîranşar de seba domanê 16 serrî Komayî merasîmê cenaza ame kerdene. Sine de zî seba Sarîna Saadîya 16 serre bi beşdarîya seyan kesan merasîmê cenaza ame kerdene û merasîm dima vurîya çalakîya protestoyî.

Şaristananê Îranî de zî çalakîyê protestoyî, bi taybetî çalakîyê wendekaran berdewam ê.

Hetê bînî ra derheqê hezar kesanê ke tepişîyabî, de îdîaname ame amadekerdene. Selahîyetdaran bi zelalî vat ke çalakîkerî hetê pawitoxanê şorişî ra bêrê muhakemekerdene. Goreyê çimeyanê muxalîfan heta nika tewr tay 450 kesî ameyê qetilkerdene û 25 hezar kesî zî ameyê destbendkerdene.