Navenda Nûçeyan- Rêxistina Mafên Mirovan a Hengawê raportek derbarê rewşa kolberên Kurd li Rojhilatê Kurdistanê belav kirîye û têde ragihandîye, ku di heyama meha derbasbûyî de li ser sînorên navbera Rojhilat û Başûrê Kurdistanê û Rojhilat û Bakurê Kurdistanê, 10 kolberên Kurd bi teqeya hêzên ewlehîyê yên Îranê hatine kuştin.

Li gor heman raportê, her di wê heyamê de 13 kolberên din jî ji alîyê hêzên Îranê ve hatine birîndarkirin.

Li alîyekî din, kolberekî Kurd bi navê Keyhan Ekrempûr ku xelkê bajarê Seqizê bû, duh Yekşemê piştî 97 rojan ji birîndarîyê ji ber dijwarîya birînan li nexweşxaneyeke bajarê Tehranê canê xwe ji dest da.

Keyhan Ekrempûr di 15 Îlonê de li sînorê Sêf ê Seqizê ji alîyê hêzên Îranê ve hatibû birîndarkirin û bo dermankirinê bo nexweşxaneyên Seqiz, Sine û Tehranê hatibû şandin.

Ev amar, mirina kolberên Kurd ên ku ji ber bûyerên din li ser sînor canê xwe ji dest dane, li xwe nagire.

Herî dawî, du kolberên Kurd ên bi navê Ferhad Xusrewî (14 salî) û Azad Xesrewî (17 salî) ku bira bûn, li bilindahîyên Tete li navçeya Hewramanê ji sermayê req bûbûn û canê xwe ji dest dabûn.

Herdu bira xelkê gundê Nê yê Merîwanê bûn û ji neçarîyê bo debara jîyana xwe li ser sînorê navbera Rojhilat û Başûrê Kurdistanê kolberî dikirin.