Dewleta Îranî Başûrê Kurdîstanî de bi fuzeyan hêrişê hêzanê Rojhelatê Kurdîstanî kerd. Goreyê selahîyetdaran kesêkî dinyaya xo bedilnaye û tewr tay 8 kesî zî birîndar bîyî.

Artêşa Îranî Başûrê Kurdîstanî de warê Partîya Demokratî Kurdistan-Îran (PDK-Î) û komeleyê ci dayî bombayan ver.

Selahîyetdaranê herêmîyan dîyar kerd ke qezaya Koyî ya Hewlêrî de panc fuzeyî kewtê bînaya PDK-Î.  Wezîrîya Weşîye ya Herêma Kurdîstanî pare kerd ke hêriş de kesêkî dinyaya xo bedilnaye, 8 kesî zî birîndar bîyî. Hêriş goreyê herême saete 08.30 de qewimîya.

Hêrişo bîn zî dewa Zirguwêzî ya Silêmanî de vera baregehanê Komeleya Zehmetkêşan ame kerdene. Derheqê nê hêrişî de agahîyê bînî nêameyî destvistene.

Serekwezîrê Herêma Kurdîstanî Mesrûr Barzanîyî hêrişê vera Koyê û Zirguwêzî şermezar kerdî û vat: ''Nê hêrişî binpaykerdişê serwerîya Herêma Kurdîstanî û Iraqî yo.''

Bi wextê herême saete 09.30 de zî wareyê Seqer û Barbizinan ê herêma Biradostî hetê dewleta Îranî ra dîyayî bombayan ver.