Muhafizanê Şorişî yê Îranî da aşkera kerd ke înan teyarayêka hewayî ya bêmerdiman a casusî ya DYA serê erdê Îranî de daya waro.

Goreyê medyaya Îranî, Muhafizanê Şorişî da zanayene ke înan wasitaya hewayî ya bi modelê Global Hawkî no Panşeme da war o.

Ame vatene ke wasita eyaletê Hurmuzganî de, herêma qeraxî ya duştê koyê Mubarekî de ameye warodayene.

Muhafizanê Şorişî vat wasitaya casuse dimayo ke wareyê hewayî yê Îranî îhlal kerd bi fuze ameye pirodayene.

Goreyê televîzyonê dewlete yê Îranî, no ware lîmanê Caskî yê serê deryayê Umanî de 
yo. Heta nika derheqê wasitaya hewayîye de tu dîmenêk nêame parekerdene.

Goreyê DYA Wareyê Hewayî yo Mîyannetewe Ame Pirodayene

Selahîyetdarêkê Amerîkanijî Reutersî rê qisey kerd û  vat, wasitaya hewayî ya bêmerdiman, serê neqebê Hurmuzî de, wareyê hewayî yê mîyanneteweyî de bi fuzêk erd ra ameye pirodayene. Goreyê selahîyetdarê Amerîkanijî, wasitaya hewayî ya bêmerdiman, droneyêka bi tîpê MQ-4C Trîton a û aîdê fîloyê Amerîka ya.