Navenda Nûçeyan - Mihemed Helbûsî ev yek roja bihorî di çavpêketineke televîzyonî de aşkere kirîye û ragihandîye, “şeş parlamente bi vîrusa koronayê ketine û wan bi xwe ji min re gotin.”

Helbûsî herwiha amaje bi wê yekê jî kir, ku “hin zanyarî hene ku hejmara tûşbûyên koronayê di nava parlamenteran de 20 kes e û tekez kir, hejmara karmendên tûşbû li parlamentoyê jî 28 kes e, ku di nava wan de rêveberên giştî û kesên têkildarîyê asayişê jî hene.”

Serokê Parlamentoya Iraqê amaje bi wê yekê kir, ku “hinek ji wan kesên li parlamentoyê bi Koronayê ketine, zêrevanên parlementeran û Pêşmerge ne” û tekez kir, “ji ber vê yekê zehmet e civîna parlamentoyê were lidarxistin.”

Wezareta Tendirustîya Iraqê jî roja Yekşemê ragihand, li Iraqê herî dawî 1 hezar û 646 haletên nû yên vîrusa koronayê û 87 rewşên mirina bi koronayê û 724 rewşên başbûnê hatine tomarkirin.

Li gor amarên fermî, heta niha li Iraqê 30 hezar û 868 kes bi koronayê ketine û 1100 kesan canê xwe ji dest dane û 13 hezar û 935 kes jî baş bûne.