Merkezê Xeberan- Çalakîyanê şermezarkerdişî de ke Iraq de di mengan ra zêdêr dewam kenê tewr tay 450 kesan wefat kerd û tewr tay 20 hezar kesî birîndar bîyî.

Qexto ke serebûtî vindertî çimtersnayîş û kiştişî bîyî zêde. Şewa sêşemeyî û çarşemeyî de cenazeya Alî El Lamîyê 49 serre ameye dîyene ke rêçê hîrê fîşekan serê ci de bîyî. Yeno vatene ke El Lamî seba ke tewrê çalakîyanê meydanê Tahrîrî bîyî rojanê peyênan de taxa El Şaabî de ca bi. El Lamî heman taxe de ameye kiştene.  Embazê ey Taysîr El Atabîyî ard ziwan ke çalakîkeran o dima ke ame kiştene dî.

Goreyê AFPyî heman çalakîkeran vat: "Milîsanê hukmatî o kişt.'' û bale ante hêzanê çekdaranê Îranî ser. Lamî çalakîkero 3. bi ke mabênê 10 rojan de ame înfazkerdene. 2ê kanûne de Zahra Alîya 19 serre babîyê xo reyde amebî remnayene û bi îşkenceyan amebî qetilkerdene. Zehra û babîyê ci meydanê Tahrîrî de werd vila kerdêne. Yewşeme zî Fehîm El Taîyo 53 serre wexto ke şîyêne keyeyê xo hetê çekdaranê bi motosîkletî amebi kiştene.

Teşrîna verêne ra nata zaf çalakîkerê Iraqî ameyî kiştene. Kesanê bi unîformayan û çekan bi desan çalakîkerî remnayî. Selahîyetdaran îdîa kerd ke înan remnayoxê çalakîkeran tesbît nêkerdî. Bexdad de roja îneyî dima ke çekdaran 20 kes qetil kerdî pêlêko newe yê remnayîşî dest pêkerd.