Tirkiyê û komên çekdar ên girêdayî wê, di 20 Çileya 2018an de êrîşî ser Efrînê kirin û piştî şerê 58 rojan, Efrîn hat dagîrkirin. Ji hezar welatiyên Kurd zêdetir kes di encama dagîrkirinê de li Efrînê şehîd û birîndar bûn, ji 250 hezar welatiyan zêdetir jî, bi neçarî derbider bûn. Heta niha jî binpêkirinên mirovî li Efrînê berdewam in û bi hezaran welatiyên Efrînê hatine revandin.

Artêşa Tirkiyê, di roja 20.01.2018an de, bi top û moşekan gund û navçeyên Efrînê Raco, Şiyê, Bilbilê, Şera, Cindirêsê, Mabeta û Şêrewa topbaran û bombebaran kirin û komên çekdar ên opozîsyona Sûriyê yên girêdayî Tirkiyê, dest bi êrîşa bejahî li ser Efrînê kirin.

Di êrîşê de, malên sivîlan, dibistan, avahiyên fermî, nexweşxane, mizgeft, cihên dîrokî û pîroz û jêrxana Efrînê hatin bomebarankirin û wêrankirin.

Amarên hatine belavkirin destnîşan dikin, ji ber êrîşê ji 300î zêdetir welatiyên Efrînê yên sivîl şehîd bûn û ji 700î zêdetir sivîl jî birîndar bûn. Herwiha zêdetir ji 250 hezar Efrînî jî bi neçarî koçber û derbider bûn, beşek mezin ji wan li gundên di navbera Efrîn û Helebê de man û beşek di jî li heman deverê di kampan de hatin bicihkirin.

Artêşa Tirkiyê û komên çekdar ên girêdayî wê, piştî şerê 58 rojan, di roja 18ê Adara 2018an de, derbasî bajarê Efrînê bûn û dagîr kirin û dest bi dizî û talana mal, avahiyên fermî, dikan û samanên welatiyên sivîl kirin.

Ji roja 18ê Adarê ve, welatiyên Efrînê di metirsî û di bin gefê de dijîn. Bi mebesta standina pereyan ji malbatên Efrînî bi hezaran xort û keçên Kurd ji aliyê komên çekdar ve hatin û tên revandin û rastî eşkenceyan tên. Li gor amarên çalakvanan, ji 7 hezaran zêdetir welatiyên Efrînê di vê heyama borî de hatine revandin û heta niha çarenivîsa ji 2 hezaran zêdetir welatiyan ne diyar e.

Herwiha, bi hezaran Erebên Xûtaya Şamê, parêzgeha Idlibê û navçeyên cuda ên Sûriyê li Efrînê di mal û milkên Kurdan de tên bicihkirin û demografiya Efrînê tê guhertin. Bi sed hezaran darên zeytûnan hatine desteserkirin û bi hezaran jî darên zeytûn û meyweyên din hatine hilkirin û qutkirin.

Ji dema dagîrkirina Efrînê ji aliyê artêşa Tirkiyê û komên çekdaran ên girêdayî wê ve, piraniya cihên şûnwarî yên Efrînê li ser destê artêşa Tirkiyê bi amûrên kolandinê yên mezin hatine kolandin û wêrankirin. Li gor çalakvanên di warê şûnwaran de, entîke û şûnwaran ji Girê Cindirêsê, Keleha Nebî Horî, Keleha Semanê û Şikefta Duderî hatine dizîn û ji aliyê komên çekdaran û bazirganan ji bo derveyî Efrînê hatine derxistin.

Li gor Rêxistina Mafên Mirova li Efrînê belav kiriye, artêşa Tirkiyê û komên çekdar ji 50î zêdetir cihên şûnwarî, girên dîrokî û mezargehên olî kolane û ji 20 hezaran zêdetir perçeyên entîka dizîne û veguhastine Tirkiyê.

Li Efrînê gelek cihên dîrokî hene, ji bilî Keleha Horî, keleha Samanê, şikefta Duderî, kenîseya Marmaron û bi dehan şûnwarên din. Nêzîkî 25 girên dîrokî hene, piraniya wan di ber çemê Efrînê re rêzkirî ne, ku dîroka wan vedigere hezar heta 2 hezar berî zayînê, piraniya wan giran bi alavên kolandinê hatine kolandin û têkdan û komên çekdar beşek ji wan giran jî kirine navendên serbazî.

Hêjayî bibîrxistinê ye, di van her 4 salên dagirkirina Efrînê de, ji ber topbaran û bombebarana artêşa Tirkiyê û kiryarên komên çekdar:

• Nêzîkî 700 sivîlan hatine kuştin
• 7 hezar û 400 kes hatine revandin ku çarenivîsa nîviya wan nediyar e
• 68 dibistan wêran bûne
• 28 pêgehên şûnwarî hatine jinavbirin
• 15 mezargehên olî li gel hejmareke goristan têk çûne
• 1 milyon 300 hezar darên biber û bêber hatine birîn