Hêrişkero ke bînaya HDPyî ya Îzmîrî vêşna xebatkara HDPyî Denîze Poyraz qetil kerd.

Wexto ke xebera hêrişî ameye eşnawitiş şar verê bînaya Konakî de ame pêser.

HDPyî derheqê hêrişî de beyanat da û va: ''Êyê ke no provakasyono bitehluke kerd, fermandarê nê serebûtî îqtîdar o ke partî û rêxistinê ma sey hedef mojnayêne.  Bînaya HDPyî ya Îzmîrî ameye vêşnayene û xebatkarêka partîye amey qetilkerdene.

HDPyî vat: ''Bi mengan o partîya ma hetê îqtîdarî ra, Wezaretê Karanê Zereyî ra yena hedefkerdene, pê armancê provakasyonî tay keyeyî verê bînayanê ma de nişnenê ro. Netîceya înan de ewro serê sibayî saete 10.30 de vera bînaya partîya ma ya Îzmîrî hêrişo çekdar ame kerdene.''

HDPyî da zanayene ke hêrişker 35-40 serre yo û wexto ke xebatkara partîye Denîze Poyraz zere de bi eşt bîna ser.

HDPyî vat: ''Hêrişkerî guleyî raşnayî derûdor û adir eşt zere. Xeylê wext ci rê mudaxele nêame kerdene. Hêriş de xebatkara  partîya ma Denîze Poyraz ameye qetilkerdene.''