Li Yunanistanê piştî ku keştiyeke koçberan bin av bû jineke Kurd û zaroka wê xeniqîn.

Hevjîna wê jinê ku di heman demê de rêwiyê wê keştiyê bû ji Rûdawê re got, “Ji ber xeletiya qaçaxçiyan hevjîn û zaroka min xeniqîn.”

Welatiyê bi navê Kawêz Sedullahê ji navçeya Çemçemalê Silêmaniyê yek ji wan rêwiyan bû ku di keştiyê de bû.

Zarok û hevjîna Kawêz Sedullah di keştiyê de xeniqîn û ew bi saxî hat rizgarkirin.

Kawêz Sedullah li ser bûyerê ji Rûdawê re axivî û got:

“Doh bi dema Yunanistanê derdora seat 23:00yan (bi dema Hewlêrê saet 00:00yan) keştiya me bi 32 rêwiyan ji Îzmîrê ber bi girava Samosê ya Yunanistanê bi rê ket.

Em di nîvê rê de bûn, hêzên deryayî yên Yunanistanê li pey me bûn û çend caran hişyarî da şofêrê keştiyê ku raweste.

Lê ew ranewestiya û saet 02:30an li çiyayekî giraveke Egeyê qelibî.

Piştî ku keştî li çiyê ket, serûbin bû û hemû rêwiyan wê ketin avê û hevjîna min Naîla Mistefa û zaroka min a neh mehî Nûr xeniqîn.”

Keştî ji bo 17 kesan bû lê qaçaxçiyan 32 kes tê de bi cih kirin ez, jin û zaroka min û du xortên din ên Kurd tê de hebûn.

Koçberên din hemû Efxan bûn.

Qaçaxçî hat girtin û rêwiyên din li Yunanistanê li qereqola polîsan in.

Ji bo vegerandina cenazeyan em bi Hikûmeta Herêma Kurdistanê re di nava pêwendiyê de ne.