Ji Seroka Piştgirên PAK-Ewropa Seval Mert bo Rêvebirên Yekîtiya Ewropa nameyek vekirî

.

A+A-

RÛPELA NÛ: Seroka PAK-Ewropa Seval Mert ji Serokê Konseya Ewropayê Charles Michel û Seroka Komisyona Ewropa Ursula von der Leyen û gelek damûdezgehên resmî yên navnetewî re nameyek vekirî şand û bal kişand ser kiryarên Tirkiyeyê yên antîdemkratîk. Seval Mert daxwazên Kurdistanîyan bi çend xalan rêz kirîye û daxwaz dike ku bila Yekîtiya Ewropa û damûdezgehên resmî yên navnetewî di derbarê pirêzeyên Tirkiyeyê yên nedemokratîk bêdeng nemînin û hişyarî bidin Tirkiyeyê.

Nameya vekirî ya Seroka PAK Ewropî wiha ye:

Serokê Konseya Ewropî - Charles Michel

Seroka Komisyona Ewropî - Ursula von der Leyen Serokên Rêzdar!

Em dizanin ku hûn pir mijûl in lê ji we tîka dikin ku hûn çend xulekan ji dema xweya hêja bidine me da ku bi me re li ser pirsgirêkeke girîng rawestin û rê bidin me ku em we bidin zanîn ka bi rastî li Tirkîyeyê çi diqewime!

Îro li Tirkîyeyê bi navê ‘’Sistema Serokatîyê’’, sîstemeke totalîter ya takekesî li ser desthilatê ye. Îro bi vê desthilatdarîya Birêz Recep Tayîp Erdoğan, parlametoya ku ji berê jî ne zêde fonksîyonel bû, bi tevayî bê fonksîyon maye. Qedera 83 mîlyon mirovan ketîye ber însafa du gotinên Recep Tayîp Erdoğan û hêzên totalîter yên ku li pê re ne.

Serokên Rêzdar!

Heroj em ji Tirkiyeyê raporan teze digirin ku mîrov çawa li parlamenter, karmend û serokên şaredarîyê û meclîsên herêmî yên Kurd ên hilbijartî ji karên xwe bi darê zorê tên bi dûrxistin. Mafên wan ên siyasî ji holê radikin, wan ji karên wan bi temamî dûrdixin û li şûna wan rêveberên nehilbijartî yên alîgirên hikûmetê bi cîh dikin. Ev li Tirkiyê demek dirêj e berdewam dike. Bi vê yekê, ew dixwazin li Tirkiyê çavên her cure muxalefetê bitirsînin û pirsgirêka Kurd çareser nekin.

Pergala hiqûqî û rêveberiya dewletê bi tevahî hatîyê polîtîze kirin. Kesên ku medyaya civakî ya ku ji hêla serokomar ve nayê pejirandin, bikartînin, têne çewisandin. Li gorî rapora Koma Krîzê ya Navneteweyî, di dema rejîma serokatiyê de çend hezar kesan jiyana xwe ji dest dane. Komîserê Mafên Mirovan ê Konseya Ewropa û herweha Komîserê Bilind ê Mafên Mirovan yê Neteweyên Yekbûyî, şîdeta li Tirkiyê, nemaze li dijî Kurdan, rexne kirin û bang kirin ku tawanên binpêkirina mafên mirovan bikolin.

Ji meha temûza 2015an heta îro, gelek siyasetmedar, nivîskar, rewşenbîr, hunermend, rojnameger, parlamenter, serokên şaredarîyan hatine zîndankirin, di derbarê bi hezaran kesan de lêpirsîn ô doz hatine vekirin.

Dewleta Tirkîyeyê gelek caran biryarên Dadgeha Mafên Mirovan a Ewropayê tune dihesîbîne. Herî dawî jî Dewleta Tirkîyeyê biryara Dadgeha Mafên Mirovan a Ewropayê ya di derbarê Selahattin Demirtaş de red kirîye. Bi vê helwestê jî peymanên navnetewî yên ku îmze kirîye binpê dike. Dadgeha Mafên Mirovan a Ewropî hewce dît ku li ser Tirkiye ferz bike ku tavilê tedbîrên pêwîst bigire û Demirtaş serbest berde. Dadgeha Mafên Mirovan a Ewropa biryar da ku Tirkiye, bi kiryarên xwe, "Pirdengî û pir rengîya dixeniqîne û ramana siyasî ya azad bi sînor dike". Dadgeha Mafên Mirovan a Ewropî hewce dît ku li ser Tirkiye ferz bike ku tavilê tedbîrên pêwîst bigire û Demirtaş serbest berde.

Azadiya çapemenî û ramanî hîmên bingehîn ên demokrasiyê ne. Guhertinên negatîf û yên neqebûlbar li Tirkiyê bi salan e berdewam dike lê niha di her warî de xuya dike ku ev prosesa negatîf zûtir cî digre. Di dema krîza coronayê de, medyaya hevalbendîya rejîmê dike, bi êrîşên xwe yên li ser pirtikên demokrasîyetê û azadiya çapemenî, ne tenê li Tirkîyeyê û Bakurê Kurdistanê, li derveyî Tirkîyeyê jî muxalîfeta li hember xwe hedef girt.

Dadgeha Qanûna Esasî doza girtinê di derbarê partîyên sîyasî yên legal ên Kurd dike ku tenê ji bo, di navê partiya wan de peyva "Kurd" an "Kurdistan" heye, vekirîye. Van partîyan di civatê de sembola pirrrengî, hevgirtin û xweşbîniyê ne. Yek ji van partiyan Partiya Azadiya Kurdistanê, ango PAK e, ku heta nuha çalakiyên sivîl, demokratîk, sîyasî û meşrû meşandiye.Lê nuha Dadgeha Qanûna Esasî doza girtinê di derbarê PAKê û 3 partîyên din de vekirîye.

Serokên Rêzdar!

Dewleta Tirkîyeyê îro pir bi aşkereyî ne bes li Tirkîyeyê û li Bakurê Kurdistanê, li her derê cîhanê sîyaseteka li ser dijayetîya Kurdan hatîye ava kirin, dimeşîne.

Êrîşa Tirkiyeyê ya li Rojavayê Kurdistanê û li bakurê Sûriyeyê li dijî sivîl, zarok, jin û pîran, zagonên navneteweyî binpê dikin û dibe sedemên gelek kuştinên sivîl. Li Rojavayê Kurdistanê hêzên leşkerî yên bi Tirkîye ve girêdayîne, her roj Kurdan direvînin, dikujin, dest datînin ser mal û milkên gelê Efrînê, Serê Kanîyê û Girê Sipîyê. Kurd ji cîh û warên xwe tên qewirandin, dewlemendiyên herêmê tên talan kirin û dizîn. Demografîya van herêman di aleyhê kurdan de tê guhertin.

Êrîşên dubare yên Tirkiyê yên li dijî kurdên Başûrê Kurdistanê rûdidin, bi çekên ku ji welatên Yekîtiya Ewropî hatine kirîn ku di nav wan de Almanya jî heye, pêk tê. Ev kirin ne ya qebûlkirinê ye.

Desthilatdarîya Dewleta Tirkîyeyê him li hundir û him jî li derve êrîş û operasyonên xwe yên leşkerî dom dike. Ji bo ku xwe li ser kar bihêlin, van êrîşan ji xwe re dikin mertal û hewl didin ku hêzên demokratîk, nivîskar, partiyên siyasî, muxalefeta heyî û tevahiya cîhana azad bitirsînin da ku xwe li dûrî rûdanên diqewimin, bimînin.

Em, sempatîzan û komên piştgiriya Partiya Azadiya Kurdistanê (PAK) li Ewropa, piştgiriyê didin hemû peymanên navneteweyî. Divê Dewleta Tirkîyeyê û Serok Komar Erdogan serweriya qanûnê, bêyî ku bêje "Lê Belê" qebûl bike, nemaze di derheqa qebûlkirin û dayîna mafê Kurdan de. Em piştgirî didin daxuyaniya Dadgeha Ewropayê ya li gora daxwazên Dadgeha Mafên Mirovan a Ewropa ku ji hemû girtiyên siyasî re tavilê berdanê, doz dike.

Serokên Rêzdar!

Kiryarên Dewleta Tirkîyeyê û yên Serok Komar Erdogan nayê qebûl kirinê û ev li dijî demokrasî û hemû peymanan e.

Em ji we, wekî Serokê YE / Konseya Yekîtiya Ewropî, tika dikin ku hun tundî li dijî kiryarên Dewleta Tirkîyeyê û yên Serok Komar Erdogan ên li Tirkiye û li warê din, yê ku şer û nakokiyan teşwîq dike, derkevin û bikevin tevgerê;

Divê Dewleta Tirkîyeyê dest ji şerî berde û ji bo çareserîyeke sîyasî bi hemû partîyên Kurdan re bikeve nav dîyalogê.
Divê hemû qedexeyên li ber azadîya çapamenîyê, ramanî û xebata rêxistinî bê rakirin.
Divê dozên girtinê yên di derbarê partîyên ku bi navê ‘’Kurdistanê’’ hatine

damezrandin, bêne betal kirin.

Divê Dewleta Tirkîyeyê di Qanûna Bingehîn û hemû yasayên xwe de hebûna miletê Kurd qebûl bike û divê zimanê Kurdî bibe zimanê perwerdeyê û bibe zimanê fermî.
Dev ji firotina çekan ji Tirkiyê re rawestînin û tafilê ambargoya çekan darxin!
Divê Dewleta Tirkîyeyê û Serokkomar Recep Tayip Erdoğan, rêzê li îradeya hilbijêran

bigre û hemû şaredarên ku di hilbijartinê de hatine hilbijartin, vegerin ser şaredarîyên

xwe.