Walîtîya Mersînî bi bahaneya 'asayîşê komelkî' kayê bi kurdkî yê bi nameyê Tartufe qedexe kerd.

Kayê bi kurdkî 'Tartufe' do Salona Kongre ya Şaredarîya Mersînî de biameyêne mojnayene la hetê Walîtîya Mersînî ra ame qedexekerdene. Kay hetê Walîtîya Mersînî ra bi bahaneya 'seba ke sîstem û asayîşê komelî xeripneno, mehqûl nêame dîyene' ame qedexekerdene. 

Tîma kayî îfade kerd ke qedexeyê Walîtîye keyfî yo û vera Şaredarîya CHPyî ya Mersînî nêrazîbîyayîşê xo mojna. La şaredarîye ard ziwan ke ê do bira walîtîye bîyarê ca.

Tîyatroyê Şaristanî yê Amedî derheqê qedexeyî de eşkerayîyêke daye. Eşkerayîye de ame vatene ke şaredarîye rixmo ke qanûnan de çîyo winasêno çin o seba mojnayîşê karî walîtîye ra destûr waşto. Eşkerayîye de wina ame vatene: ''Ma sey tîma kayî tîya de bîyî û ma kayê xo de israr kerd la nêeşkayî netîce bigêrê.''