Merkezê Xeberan- Platformê KESKî yê Amedî  seba tayînkerdişê qeyûman û karmendê ke bi KHK’yan amê îxrackerdiş Kuçeyê Hunerê yê Ofîsa Amedî de beyanatêk da çapemenî.

Hemserekê KESKî Mehmet Bozgeyîk, îdarekerê KESKî, Serekê TUMBEL-SENî Erdal Bozkurt û endamê TUMBEL-SEN beşdarê beyanatî bîyî. Nameye KESKî ser o Erdal Bozkurtî beyanat wend.

Erdal Bozkurtî wina va: “Prosesê tayînkerdişê qeyûman dewam keno. Îktîdar bi polîtîkaya qeyûman wazeno şarî ra heyf bigîro. Hukmat bi no qayde beledîyeyan talan keno, xo rê qesranê qijan virazeno û ranto ke peyda beno mîyanê merdimanê xo de vila keno.”

Bozkurt eleqe ant demê qeyûman ser û wina va: Hezar û 500 endamê sendîkaya ma bê hûqûqî kar ra amê eştene. Na neheqî ya. Ma no muamele şermezar kenî û wazenî wa hevalê ma peyser bigirîyê kar..

Bozkurtî ra dima hemserekê KESKî Mehmet Bozgeyîk zî qiseykerdişêk kerd û va: AKP nika welat bi OHAL, KHKyan, qeyûman û bi darbeyê sivîl û siyasî îdare kena.