Ev pirtûka Konê Reş bi navê (Gernameya Min: Geşt û Serdan), di nav weşanên Yekîtiya Rewşenbîrên Cizîrê de, li bajarê Qamişlo hatiye çapkirin. Konê Reş di vê pirtûkê de hin ji geştên xwe; çûn û beşdariyên xwe yên dervî Rojava û Sûriyê, di warê çand û hunera Kurdî de bi firehî nivîsandine û şirove kirine; çima çûye? Kî dîtiye û çi kiriye.. Mijarên vê pirtûka wî, li dor zîlana ziman, wêje û rewşenbîriya Kurdî dizîvire..  Naverok jî ev e: 

 1 - 20 rojên Hêja li Beyrûtê, 2 - Çûna Kurdistanê (Soran): I - Festîvala Rewşenbîriya Soran II - Festîvala Îhsan Nûrî Paşa li Duhokê III - Serdana Şêxan û Lalişa Nûranî, 3 - Çûna Batmanê, Festîvala Cegerxwîn 1/2,  4 - Çûna Wan û Miksê (Festîvala Feqîyê Teyran), 5 - Çûna Mêrdînê, 6 - Festîvala Çand û Hunerê û Geştek di Nav Baxên Cizîra Botan de, 7 - Çûna Brukselê ji bo wêjeya Kurdî, 8 - Çûna Muzexaneya Niştimanî li Hewlêr, 9 - Çûna Kurdistanê 1979 û Festîvala Bedirxaniyan/ 2006, 10 - Çûna Zankoya Zaxo û Hewlêr 2019, 11 - Çûna Kobanî û Sê rojên bê bêhinvedan di pêşangeha pirtûkan de, 12 - 7'mîn Filmefestîvala Duhokê, 13 - Kongireyê 8an a PENa Kurd li Amedê, 14 - Festîvala Cegerxwîn li Hewlêrê 2008.

  Konê Reş di pêşgotinê de wiha gotiye: (Li gor ku ez serwextî toreya ereba me, nexasim a ku ew binav dikin; Toreya Gerê an Toreya Geştê, min jî xwest ku ez van çend gerên xwe an geştên xwe wek pirtûkekê ji xwendevanên zimanê kurdî re berhev bikim..). Ev pirtûka Konê Reş germane ye, wek ku bi zimanê Ingilîzî dibêjin; (Voyages Literature). 
  Mamoste Hejar Îbrahîm jî, di pêşgotna vê berhema min de wiha gotiye: (Konê Reş; torevan be, lêkolîner be û berî her tiştî aşiqê ziman, wêje û kevnetora gelê xwe be, bêguman ew ê çirayekê di tariyê de vêxîne. li gor ku ez Konê Reş ji nêz ve nas dikim, wî tev jiyana xwe ji ferhenga kurdî re terxan kiriye û ev yek xweş diyar û belû ye, di gerên wî/ an geştên wî yên ku hin ji wan dûrî kurdewariyê ne, lê wî bi zîrekbûn ta bi wan geran jî, xistiye xizmeta kurdewariyê de, wek geşta wî a 20 rojan li Beyrûtê.. Ez nebawerim ku pêdiviya mamoste Konê Reş bi pesnê min hebe, pirtûka di nav destê we de, xweş dîdevan e ji pesnê wî re û xweş nimûne ye ji toreya geştê re di nav kurdan de.)

Pirtûk ji 250 rûpelan pêk tê, di nav weşanên Yekîtiya Rewşenbîrên Cizîrê de, li bajarê Qamişlo hat çapkirin/ 2021. 
Hêjaye gotinê ku mamoste Hejar Îbrahîm yê ku pêşgotin jê re nivîsandiye, ew Mamosteyê roman û pexşana toreyî ye, di zanîngeha Ferat de, beşê zimanê Fransî.