Daniel Holtgen di peyama xwe de got: “Li gor xala 46em a rêkevtinê hemû dewletên endam pabendê biryarên dadgehê ne.”

 

Parêzerên Selahattin Demirtaş bi hinceta binpêkirina mafên Demirtaş ên azadî, ewlehî, darizandin û hilbijartinê serî li Dadgeha Mafên Mirovan a Ewropayê dabû.

 

Dadgehê îro biryara xwe ya di derbarê Selahattin Demirtaş de da û ragihand, ku girtina wî li dijî hiqûqa navxweyî û navdewletî ye û daxwaz ji Tirkiyê kir, bo berdewamkirina girtina wî heta ku hincet û belgeyên nû neyên pêşkeşkirin, divê Demirtaş di demeke herî nêzîk de were azadkirin.

 

Dadgeha Ewropayî di biryara xwe de da xuyakirin, ku mafên Demirtaş ên girtina dimdirêj û hibijartinê û xala 18emîn a Rêkevtina Mafên Mirovan a Ewropayê hatiye binpêkirin û herwiha Tirkiye dê 10 hezar euro qerebûya manewî û 15 hezar euro jî bo mesrefên dozê bide.

 

Li ser vê biryara DMME Serokomarê Tirkiyê Recep Tayyip Erdogan anî ziman ku ev biryar Tirkiyê eleqeder nake û got, em dê hemleya xwe ya li dijî vê biryarê bidin. Herwiha Wezîrê Dadê yê Tirkiyê Abdulhamit Gul jî da xuyakirin, ku dive ew pêşiyê vê biryara Dadgeha Ewropayê bibînin û got, biryara dawiyê dê ji aliyê dadgeha Tirkiyê ve were dayîn.

 

Li gel vê yekê parêzêrên Selahattin Demirtaş piştî biryara DMME bo azadkirina Demirtaş serî li 19emîn Dadgeha Cezaya Giran a Enqereyê da.