Navenda Nûçeyan- Doh 12.12.2019ê cîgirê serokê parlamentoya Kurdistanê Hêmin Hewramî pêşwazî li berpirsê sîyasî û aborî yê konsolxaneya giştî ya Amerîkayê li herêma Kurdistanê Andrew Lentz û şandeya li gel kir.

Di hevdîtinê de Hêmin Hewramî rewşa sîyasî û aborî ya herêma Kurdistanê û peyvendîyên navbera Hewlêr û Bexda û alozîyên naha li Iraqê û tevgera DAIŞê bo şandeya Amerîkayê rawe kir.

Herwaha got, projeyasaya çaksazîyê duh ji alîyê encûmena wezîrên herêma Kurdistanê ve hatîye pejirandin û îro jî geheştîye Parlamentoya Kurdistanê.

Cîgirê Serokê Parlamentoyê ragehand: ‘’Parlamento erkên yasayî yên vê projeyê dê bi awayê herî baş li gor berjewendîyên xelkê Kurdistanê encam bide û armanca projeyê peyda kirina dadperwerî ye ji alîyên darayî ve.’’

Li beranber da berpirsê karûbarên sîyasî û aborî yê konsolxaneya giştî ya Amerîkayê li herêma Kurdistanê Andrew Lentz keyfxweşîya xwe derbarê projeyasaya çaksazîyê de dîyar kir û ragehand: ‘’Amerîka piştevanîyê li encamdana çaksazîyan li herêma Kurdistanê dike. ‘’ Ji bo wê jî amadebûna xwe ya ji bo alîkarîya herêma Kurdistanê anîn ziman.

Çavkanî: Basnews