Konya de keyeyo kurd Dedeogullari raştê hêrişê nîjadperest ame. 60 hêrişkeran ra têna 4ê ci tepişîyayî. Polîsan zî keye sûcdar kerd.

Taxa Behçeşehîrî ya qezaya Meramî ya Konya de keyeyo kurd Dedeogullari 12ê gulane de raştê hêrişê 60 kesan ame .

Nîjadperestan eşt keyeyê Dedeogullari ser û vat 'Ma ulkucî yê, ma do nêverdê şima tîya de biciwîyê.' Nîjadperestan pê kerra, kard û kolîyan hêrişê keyeyî kerd. Hêriş de Metîn Dedeogullari de gonîbiyayîşê  mezgî virazîya, endamê bînî yê keyeyî zî bi giranî birîndar bîyî.

Bariş Dedeogullariyî da zanayene ke 12ê gulane de şewe saete 22.00 de koma bi 60 kesan eşt baxçeyê înan ser û înan vat: ''Ma ulkucî yê, ma nêverdê şima tîya de biciwîyê.'Birayê mi de rijîyayîşê gonîya mezgî vejîya, 3 rojîyo ke servisê ciewnîyayîşê giranî de yo. Waya mi zî 4 rojî nêweşxane de mend. Babîyê mi 66 serre yo, birîndar bîyo. Ez û di wayê ma yê bînî zî ma bi giranî birîndar bîyî. Semedo ke ma kurd ê, ê nêwazenê ma taxe de bimane. A roje polîsî ameyî la polîsan ma kerdî sûcdar.''

Avûkatê keyeyî Abdurrahman Karabulutî zî pare kerd ke hêrişkerî Ali Keleş, Ayşe Keleş, Yahya Çalik, Lutfî Keleş, Ali Çalık, Şerîfe Çalik û Velî Keleş tepişîyayî la A.K., R.Ç., A.Ç., û Î.K. pê şertê kontrolê edlîyî vera dîyayî. Alî Çalik zî dima vera dîya. Hêrişê bi 60 kesan de 4 kesî tepişîyayî.