Navenda Nûçeyan- Korbend bi navnîşana projeya Destpêşxerîya Asankarî û Veberhênana Neynewayê û bi çavdêrîya Cîgirê Serokê Amerîkayê û bi hevkarîya Herêma Kurdistanê, DAI û USAID (Ajansa Amerîka bo Geşedana Navdewletî) tê lidarxistin.

Kompanyayên Iraq, Herêma Kurdistanê, welatên Kendavê û Amerîkayê di vê korbendê de beşdar in.

Tora Medyayî ya Rûdawê jî sponsorîya korbendê dike.

Korbendê ji roja Sêşemê 3ê Kanûnê ve dest pê kirîye û heta sibe Pêncşemê 5ê Kanûnê berdewam dike.

Di korbendê de gotûbêj li ser çawahîya vegerandina jîyana aborî bo parêzgeha Neynewa tê kirin, herwiha behsa hevkarîkirina xelk û ciwanên Neynewayê bo dîtina defetên kar, bi kar xistina projeyan ji alîyê hêza kar a Neynewayê, avakirina projeya aborî û sektora taybet li Neynewayê tê kirin.

Qubad Talebanî: Dibe Kurdistan bibe derîyekî giring bo avedakirina Neynewayê

Cîgirê Serokwezîrê Herêma Kurdistanê, Qubad Talebanî jî di korbenda Avedankirina Mûsilê de amade bûye û di gotarekê de ragihand: “Dibe Kurdistan bibe derîyekî giring bo avedakirina Neynewayê û em jî wek Hikûmeta Herêma Kurdistanê, ji bo alîkarîkirina di avedankirina vê parêzgehê de amade ne.”

Qubad Talebanî amaje bi alîkarîyên Herêma Kurdistanê bo aware û koçberên Mûsilê kir û dîyar kir, “nêzîkî milyonek koçberên sînorê Neynewayê li ‎Herêma Kurdistanê ne” û Herêma Kurdistanê gelek alîkarîya wan kirîye.

Cîgirê Serokwezîrê Herêma Kurdistanê herwiha tekezî li ser baştirkirina rewşa Neynewayê kir û destnîşan kir: “Divê hikûmeta navendî karê zêdetir bo Neynewa bike.”

Parêzgarê Mûsilê: Kudistan piştevanê me yê sereke ye

Parêzgarê Mûsilê, Necim Cibûrî jî tevî hejmarek berpirsên vê parêzgehê di korbendê de beşdar in. Necim Cibûrî di korbendê de gotarek pêşkêş kir û ragihand, tevî ku hejmara niştecihên Neynewayê derdora 4 milyon kesan e, lê bûdceya ku hikûmeta navend jê re terxan dike, ji milyonek dolar zêdetir nîne û tekez kir, ew bûdce beşa pêdawîstîyên vî bajarî nake.

Necim Cibûrî têkildarî rola Herêma Kurdistanê di alîkarîkirina Neynewayê de jî axivî û got: “Kurdistan, piştevanekî me yê sereke ye.”  Cibûrî daxwaz ji veberhêneran jî kir, ku netirsin û li sînorê vê parêzgehê dest bi veberhênanê bikin.

Cibûrî di beşeke din a gotinên xwe de da xuyakirin, “şaşîyên bihorî bûne sedem ku Mûsil bibe binkeya terorîstan, lê êdî Neynewa nabe navendek ji bo terorîstan.”

Parêzgarê Neynewayê amaje bi şer û rûbirûbûnên li dijî DAIŞê li sînorê wê parêzgehê kir û got, Neynewayê di şerê rûbirûbûna DAIŞê de li şûna hemû cîhanê gelek qurbanî dan.

Bi gotina Necim Cibûrî, operasyonan bandorek mezin li ser jêrxan û sektorên cuda yên parêzgeha Neynewayê hebûne û tekez kir: “Niha Neynewa mijûlî dermankirina birînên xwe ye.”

Di berdewamîya axavtinên xwe de, Parêzgarê Neynewayê behsa derfetên veberhênanê li vê parêzgehê kir û dîyar kir, li Mûsilê derfetên baş ji bo veberhênanê hene û herwiha ev parêzgeh xwedîyê samanên mezin e. Necim Cibûrî ragihand: “Çavê me li vê yekê ye ku ji bo dubare avakirina vê parêzgehê em bigihin qonaxeke pêşkevtî.”

Çavkanî: Rûdaw