Merkezê Xeberan - Rîyê janê Korona ra hûmara kesê ke merdî 264 hezar a. 150 hezaran ra zafêr ê nê mergan Ewropa de bîyê. Tehlukeyê Korona hema esto la rîyê ekonomî ra tedbîrî yenê sistkerdiş.

Gorê xarîtayê Unîversîteya Johns Hopkinsî pêroyê dinya de 264 hezar 400yî ra zafêr kesî rîyê janê Korona ra merdî.

Hûmara kesanê ke pê nê janî kewtî zî 3 mîlyon û 775 hezar a. Seba ke xeylê welatan de testî kêm ê, yeno texmînkerdene ke hûmara merde û nêweşan hîna zaf a. Nêweşan ra 1 mîlyon û 180 hezar kesî bîyê weş û janî ra xelisîyayî.

Janê Korona tewr zaf da Ewropa ro. Nê parzemînî de 150 hezaran ra zafêr  kesî merdî. Tewr zafî zî ,Qralîya Yewbîyayîye, Italya, Ispanya û Fransa de qewimîyayî. Goreyê welatan zî tewr zaf Amerîka de merg qewimîya. Tirkîya zî welatê ke nêweşê înan zafê mîyanê înan de rêza 8ine de ca gêna.

Seba ke welatî kewtê krîzê ekonomî tedbîranê keye de mendişî kenê sist. Îdareyê Berlino ke vano netîceyo hole tedbîran ra girwto qerar girewt ke aşma gulane zafê tedbîran wedaro. Têna do sînorî qefilnaye bimanê  û aktîvîteyê girdî nêrê kerdene. Reyna xeylêk welatanê bînan de rixmo ke tehlukeyê Korona hema esto tedbîrî pêde pêde yenê sistkerdene

Komîsyonê Ewropa da zanayene ke herêma Euro de hetê ekonomî ra rewşe verbi xirabî şina. Amerîka de zî Korona ekonomî ser o sey tsunamî tesîr kerd. hewteyo ravêrte reya verêna ke 3 mîlyon kesan semedê bêkarîya qeydê xo viraşt. Rêxistina Turîzmî ya Dinya da zanayene ke rîya Korona ra beno ke emser hûmara turîstanê mîyanneteweyî se ra 60 û 80 bêro war.