Merkezê Xeberan- Fransa de kombîyayîşê Konseya Asayîşî yê şanê Yewşemeyî ra dima îşxalkarîya Tirkîya pê vatişêko tewr pît amey şermezarkerdene û ame vatene ke, seba sivîlan û leşkeranê Fransa yê ke Sûrîye do tedbîrê asayîşî bêrê girewtene. 

Qesra Elysee kombîyayîş ra pey beyanatêk da û  aşkera kerd ke, 'çend seatê verê ma' Vakur û Rojahilatê Sûrîye de seba qetîkerdişê hêzanê asayîşî yê personelanê leşkerî yê Fransa û sivîlan do tedbîran bigêrê.

Dewleta Amerîka aşkera kerdbî ke, do leşkeranê xo Vakurê Sûrîye ra peyser biancê. Herême de bi seyan leşkerê hêzanê taybetan ê Fransayijan estê. Sûrîye de xebatê hetkarîya merdimîye yê Fransa zî estê. Koşka Elysee da zanayîş ke ê hêrişanê Tirkîya "bi hewayêko pît" şermezar kenê û seba ke nê hêrişan vindernê xebatanê diplomatîkan kenê.

Beyanatê nuştekî de ame vatene: "Ganî ma hîna zêde xebate bikê ke ma nêverdê reyna DAÎŞ bikewo meydanan. Rîyê operasyonê Tirkîya ra rîsko ke terorîstê DAÎŞ'î biremê nêame hesabkerdene. Seba ke asayîşê neteweyî bêro xurtkerdene tedbîrî ameyî girewtene."