Navenda Nûçeyan - Wezîrê Tendirustîyê yê Herêma Kurdistanê Saman Berzencî ragihand, “cihên hatine kerentînekirin, tûşbûyên koronayê lê hene.”

Saman Berzencî dîyar kir, “taxên Alton City, Şêx Ehmed, Karêzan, Zanko, Çinar, Mamostayan, 124ê Gulan, Jîyan, Zîlan City, 94ê Badawe û Kanî Genî ji îro ve têne kerentînekirin.”

Berzencî got, ji ber wê yekê ku hejmarek tûşbûyên koronayê li wan taxan hatin tomarkirin, biryara kerentînekirina wan hat dan.

Berî daxuyanîya Wezîrê Tendirstîyê, Berpirsê Şubeya Pişkinîn û Lidûvçûnan li Rêveberîya Giştî ya Tendirustîya Hewlêrê, Hekar Ebdulxenî ji Rûdawê re gotibû, wan biryara kerentînekirina taxa Karêzan a bajarê Hewlêrê daye û tekez kiribû, di plana wan de ye ku 10 taxên din ên bajêr jî kerentîn bikin.

Di çend rojên bihorî de li taxa Karêzan a Hewlêrê, berovajî biryar û rênimayîyên herdu wezaretên navxwe û tendirustî yên Hikûmeta Herêma Kurdistanê, du malbatan du merasimêm tazîyê danîbûn û ew yek bibû sedema tûşbûna bi dehan kesan.

Wezareta Tendirustîya Herêma Kurdistanê ragihandîye, ji duh ve heta îro 49 kes li sînorê parêzgeha Hewlêrê bi koronayê ketine, ku 44 kes duh û 5 kes jî îro tûşbûna wan bi koronayê hat ragihandin.

Li gor amarên Wezareta Tendirustîyê, heta niha 288 kes li Herêma Kurdistanê bi vîrusa COVID-19 ketine, ku 105 kes ji nexweşan baş bûne û 3 kesan jî jîyana xwe ji dest dane.

Almanya komek pêdivîyên nojdarî bo rûbirûbûna Koronayê da Herêma Kurdistanê

Herêma Kurdistanê: 11 kesên din tûşî vayrusa Koronayê bûne

Ekrem Hiso: Pêwîstîya Rojavayê Kurdistanê bi alîkarîya aborî û tendirustî heye

Li Bakurê Kurdistanê 605 kes bi Koronayê ketine