Li parêgeha Rihayê ya Bakurê Kurdistanê kar û barê kolana Koşka Heranê berdewam e. Koşk di nava Keleha Heranê de ye û li gorî dîroknasan ew di Serdema Navîn de hatiye avakirin.

Li navçeya Heranê ser bi parêzgeha Rihayê ya Bakurê Kurdistanê kolandin û paqijkirina li Koşka Heranê ku 9 sal in berdewam in ber bi dawiyê ve diçin û tê plankirin sala bê bo serdana geştyaran bê vekirin.

Serokê kar û xebata kolandinê amaje bi wê yekê dide ku destpêka îsal 4 odeyên girêdayî holê dîtine û heta niha yek ji wan vekirine.

Serokê Kar û Xebata li Koşka Heranê Prof. Dr. Mehmet Onal dibêje: “Ev odeya me vekir firehiya wê nêzîka 5 metre û 7 metre jî bilind e. Girêdayî vê odeyê me odeyeke din jî dît ku wek odeya xewê hatiye bikaranîn. Em difikirin ku ev ode yên rêveberên bajêr û fermandaran bin.”

Di kolanên li vê derê de bo veguhestina axê sîstema bantê ya otomatîk ku 60 metre ye tê bikaranîn û ax rasterast bo derve tê şandin.

Prof. Dr. Mehmet Onal herwiha got: “Niha kes nikare serdana Koşka Heranê bike, ji ber kar û xebatên kolandinê berdewam in. Lê em plan dikin ku pireke bi daran çêbikin. Sala borî me bermahiyên pirekê dîtibûn û me bo wê projeyek amade kir. Dema ev proje bê cîbicîkirin dê sala bê geştyar bikaribin koşkê bibînin.”

Li gor pêşbiniya dîroknasan perestgehên Sin û Sabiyan ku dîroka wan vedigere berî 3 hezar salan jî di Koşka Heranê de hene lê heta niha derbarê wan de ti bermahî nehatine dîtin.

Bi gotina rêveberên kar û xebatên kolandinê ji bo koşk li ber geştyaran bê vekirin tê plan kirin pireke bi dirêjahiya 25 metre û 10 metre bilind ji zemînê bo qata duyem bê çêkirin.