Artêşa tirke ya ke dewê Geverî dayî bombayan ver cinî, qic û kokimî zî tede tewr tay 20 dewijan rê îşkence kerd. 13 kesî ameyî pêgirewtene û ê bînan ra xebere çin a.

Herêma Astenga Reşe ya ke dormeyê dewanê Şîşemzîn, Xurekana, Seyîda û Xurekana Temoyî yê qezaya Geverê ya Colemêrgî de hêrişê leşkerî dewam kenê. Herêma ke tede pêkewtişê giranî qewimîyenê rê vizêr 3 ambulansî ameyî sewqkerdene.

Leşkeranê tirkanê ke pê wesayîtanê zirxinan eşt dewan ser qicê 11 serre zî tede xeylêk kesan rê îşkence kerd. Leşkeran dima ra qicî eştê verê berê înan û înan rê heqeret kerd. Leşkeran qicêko 8 serre û cinîyê kokimî zî tede tewr tay 20 kesî destbend kerdî û pê zorî berdê waranê hêrişî. Goreyê zanayîşanê ke dewijan ra ameyî girewtene dewijê ke ameyî berdene waranê hêrişî dest nîya telefonanê înan ser. Şiwanê dewa Şîşemzînî zî ameyî destbendkerdene û tehdîtkerdene.

13 kesê ke ameyî berdene warê hêrişî û dima ra ameyî destbendkerdene nameyê înan wina yê: Zozan Turgute, Nevîn Turgute, Rahmî Turgut, Rojhat Turgut, Denîz Turgut, Necmettîn Turgut, Nedîm Turgut, Îzzettîn Turgut, Behçet Engudar, Firat Engudar, Demhat Engudar, Bîrhat Engudar û Ozgur Engudar.

Zozan Turgute û Nevîn Turgute pîya di cinîyanê bînanê ke nameyê ci nêameyî zanayene serbest ameyî veradayene. Derheqê kesanê bînan de zanayîş nêame girewtene ke çira ameyî berdene. Dewijê Şîşemzînî yê ke dekewtiş û vejîyayîşê ci qedexe yo û binê ablûqaya polîsan de yê, semedê merdimanê xo qesawet kenê. Dewijan semedê hîsgêrîye veng da rayapêroyîye.