M. Alî Nametogullariyo ke Wan de pê guleyanê leşkeran birîndar bi, rewşa ci hema zî giran a. Nametogullariyî îfadeyê xo de pare kerd ke leşkeran verî dayo ey ro dima zî guleyî eştî ci.

Mehmet Alî Nametogullariyo 20 serre taxa Erçekî ya Wanî de leşkeran pê guleyan o birîndar kerd. Tedawîya ey nêweşxane de dewam keno. Ciwanî qala serebûtî kerd.

Herêma Erçekî ya Wanî de leşkeran Mehmet Alî Nametogullariyî rê guleyî eştî û seba ke birîndar bi wedarîya Nêweşxaneyê Zanînsgehê Yuzuncu Yilî yê Wanî. Rewşa weşîya Nametogullariyî giran a. Leşkeranê qereqolê Erçekî nêweşxane de îfadeyê ey girewt.

Babî Îsmet Nametogullariyî da zanayene ke lajê ci wina îfade dayo: ''Waya mi Wan de nêweş bîye, waşt ke ez aye bera nêweşxane. Semedo ke ruhsatê mi çinbi û pandemî ra qedexe estbi mi waşt ez rayîrê Keçanîsî ra şora.  La wexto ke ez dewe ra vîyartêne leşkerî ez dîya. Ez vinderta. Wexto ke ez wesayîtî ra peya bîya leşkerî qîrayî û ver bi mi vazdayî. Leşkerêkî da mi ro û leşkerêkê bînî zî 4-5 metreyan ra guleyî eştî mi. Mi vat 'Şima çira guleyan erzenê mi, mi se kerd.' Înan ez berda nêweşxane.''

Babîyî pare kerd ke ê do gerreyê leşkeran bikerê. Goreyê zanayîşan Nametogullari do amelîyat bibo.