Navenda Nûçeyan- Ji bo koça dawîyê ya Sekreterê Partîya Pêşverû ya Kurd li Sûrîyê Abdulhemîd Hacî Derwêş, bi endamên Partîya Azadîya Kurdistanê(PAK) şîn hate danîn.

Îro, 26.10.2019, li Amedê ji bo koça dawîyê ya Sekreterê Partîya Pêşverû ya Kurd li Sûrîyê Abdulhemîd Hacî Derwêş,  şîn hate danîn. Gelek endamên Partîya Azadîya Kurdistanê(PAK), sîyasetmedar, rewşenbîr û hemwelatî beşdarî şînê bûn. Şîn bi rawestîna rêzgirtinê destpêkir. Dûre Şex Misbah fatîha xwend.

Di şînê de Seîd Veroj, serokê Partîya Sosyalîst a Kurdistanê Mesud Tek, serokê Partîya Kominîst a Kurdistanê Sînan Çîftyurek û Osman Karavîl axivîn.

Sekreterê Partîya Pêşverû ya Kurd li Sûrîyê Abdulhemîd Hacî Derwêş roja pênşemê, 24.10.2019,  di temenê 89 saliyê de li bajarê Qamişlo koça dawîyê kiribû.

Derwêş yek ji kevintirîn sîyasetvanên Rojavaya Kurdistanê bû û yek ji damezrênerê yekem partîya Kurdî li Surîyê Partîya Demokrat a Kurdistanê di sala 1957 de bû.