Odeya Bijîşkan a Amedê rapora mehên îlon û cotmehê ya Kovîd-19 eşkere kir û ragihand ku li Amedê rojane carna bi ser 800’î û rojane teqrîben 500-600 weqayên Kovîd-19 tên tespîtkirin.

Odeya Bijîşkan a Amedê rapora Kovîd-19 a mehên îlonê û cotmehê li ser bernameya Zoomê bi raya giştî re eşkere kir. Odeya Bijîşkan di rapora xwe de dide eşkerekirin ku li Amedê rojane carna bi ser 800’î û rojane teqrîben 500-600 weqayên Kovîd-19 tên tespîtkirin. Di raporê de tê gotin her wiha di vê pêvajoya giran a koronayê de hezar û 182 xebatkarên tenduristiyê bi nexweşîna Kovîd-19 ketine û 13 xebatkarên tenduristiyê jî jiyana xwe ji dest dane.

Di raporê de hat gotin pandemî bi hemû tesîra xwe ya giran didome û asta pêla yekemîn a şewbê hêj nehatiye tekbirin.

LI NAVENDÊN TENDURISTIYÊ TEVDÎR KÊM IN  

Di raporê de hat diyarkirin li Navendên Tenduristiyê yên Malbatan hejmara nexweşan zêde dibe û li van navendan kelûpelên parastina ji koronayê têr nakin û ewlehiya xebatkarên tenduristiyê tê piştguhkirin.

MAMOSTE BI KORONAYÊ DIKEVIN

Di raporê de hat destnîşankirin ku li dibistanan tevdîrên li dijî koronayê têra xwe nehatine girtin û ji berk u derbasî perwerdehiya rûbirû bûye her roj li Amedê bi dehan mamoste serî li nexweşxaneyan didin û testên wan ên koronayê pozîtîf derdikeve.

ZEMKIRINA AVÊ TENDURISTIYA CIVAKÊ DIXE XETEREYÊ

Di raporê de hat gotin ku zemkirina avê ya ji aliyê Şaredariya Bajarê Mezin a Amedê ve tenduristiya civakê dixe xetereyê.

HEJMARA GIRTIYÊN BI KORONAYÊ DIKEVIN ZÊDE DIBIN

Di raporê de hat xwestin ku li girtîgehan ji ber pandemiyê şert û mercên girtiyan bi taybet were başkirin û ji ber ku li girtîgehan tevdîrên xurt nayên girtin hejmara pêketiyên koronayê li girtîgehan her ku diçe zêde dibin û agahiyên nexweş ji girtîgehan tên.

Di dawiya raporê de pêşniyazên ji bo tevdîrên li ber koronayê hatin rêzkirin.