Navenda Nûçeyan- Otombîleke bombekirî bi karwaneke hêzên Tirkî li bajarokê Cerablus yê Sûrîyê de teqîya, kuştî û birîndar hene.

Dezgeha çavdêrîya mafên mirov li Sûrîyê, ku navenda wê li Brîtanya ye, ragihandîye, duhî dema karwaneke hêzên Tirkî diçû binkeya El Bildeq ya Cerablusê, bi rê de otombîleke bombekirî bi wê karwanê de teqîya.

Li gorî agahîyên wê dezgeha sivîl, komek serbazên Tirkîyê hatin kuştin û birîndar bûn. Birîndar birin nexweşxaneyên Tirkîyê. di heman demê de jî firokeyên Tirkîyê li esmanê wê navçeyê digerîyan.

Ajansa fermî ya Sûrîyê, SANA, jî behsa wê teqînê kirîye û daye zanîn, di wê teqînê de 5 serbazên Tirkîyê hatin kuştin û 12 serbaz jî birîndar bûn.

Heta niha di medyaya Tirkîyê de behsa wê teqînê nehatîye kirin.