Şeva borî li nêzîkî gundekî Efrînê di navbera hêzên Kurdî û çekdarên girêdayî Tirkiyê de şer û pevçûn derketin.

Li gor medya ser bi opozisyona Sûriyê, şeva borî, li nêzîkê gundê Basûfanê yê herêma Efrînê, şer û pevçûn di navbera şervanên Kurd û çekdarên opozisyona Sûriyê de derketine.

Li gor çavkaniyên ser bi opozisyona Sûriyê, hejmarek şervanên Kurd hewl dane biçin nav gundê Basûfanê û di encam de şer û pevçûn derketine.

Gundê Basûfanê yê herêma Efrîna Rojavayê Kurdistanê gundekî Kurdên Êzdî ye û ji aliyê hêzên Tirkiyê û çekdarên opozisyonê ve hatiye dagîrkirin.

Artêşa Tirkiyê û grûpên çekdarên tundrew ku ser bi opozisyona Sûriyê ve ne û Tirkiye piştevaniya wan dike, roja 20ê Çileya 2018an êrişeke berfireh a bejayî û asmanî bo ser Efrînê dan destpêkirin ku di bin kontrola hêzên Kurdî de bû.

Piştî wê êrişa berfireh a bi her cor çekên giran, bajarê Efrînê roja 18ê Adara 2018an ket destê artêşa Tirkiyê û grûpên çekdar.

Di encama êrişên giran û ketina bajêr bo destê çekdaran de, bi sed hezaran xelkê Kurdan mal û warên bicî hiştin û ketin ser rêyên koçberiyê.

Herwiha ji wê roja ku Efrîn ket bin dagirkirina artêşa Tirkiyê û komên çekdar ên opozisyona Sûriyê, binpêkariyên li hember welatiyên Kurd li wê herêmê berdewam in.

Heta niha ji aliyê rêxistinên xwecihî û navdewletî ve bi dehan binpêkariyên li dijî xelkê sivîl hatine tomarkirin ku ji aliyê çekdarên girêdayî Tirkiyê ve hatine encamdan.