Wênevan Muzaffer Oruçoglu di 20ê sibata 1948an da li gundê Zavota mezin, ku girêdayî bajarokê Gole yê bajarê Qersê bûye. Wî dibistana seretayî li gundê Zavota biçûk û Qersê xwendiye. Dibistana navîn jî her li Qersê û lîse jî li Rîzeyê xwendiye. Xwendina xwe ya bilind jî li Zanîngeha Stembolê, Fakulteya zanistan, beşê Astronomî û Matematîkê kuta kiriye. 
Di 1968an de beşdarî tevgera xwendekaran bûye û ketiye redaksiyona kovara Çepê tirk. Piştî darbeya 12ê adara 1971ê ji ber çalakiyên xwe yên siyasî hatiye girtin, 13 salan di zindanê de maye ku di wê navê de helbest û roman nivîsîne.
Piştî ku derdikeve tê li Fransayê bicîh dibe, nivîskarî û wênevaniya xwe didomîne. Di 1988an de diçe Awustraliya, du salan diçe Xwendegeha wêne û peykertiraşiyê ya Melbournê. Ji wir jî derbasî Enstîtuya teknolojiyê dibe û li beşê Hunerê gelerî peykertiraşiyê dixwîne.
Her wiha li dor sîh pirtûkî çap dike, ku ji wan 13 roman, 7 berhevokên helbestan, 3 berhevokên çîrokan û 2 jî çîrok in. Ew her li Awistraliyayê dijî.
Pêşangeha wî ya li Enstîtuya kurdî ya Parîsê bi ser navê “Dinya hemî mala min e” hatiye li dar xistin û tê de hin portreyên nivîskarên cîhanî, berhemên wan ên serekî yan lehengên berhemên wan hene. Wî di wêneyên xwe de teknîkên cihê yên wêneyên zeytî, akrîlik, şîrêza okalîptus û stîlên tevlîhev ên realîst û surrealîst pêk aniye ku formên nû peyde bike. Berhemên wî li ser mijarên mercên jin, zarok û karkiran e.