Tîmên ser bi Qaymeqamiya Hewlêrê ve ji bo kontrolkirina nirx û paqijiyê serdana xwaringehên bajêr kirin. Qaymeqamiya Hewlêrê jî ragihand, her xwaringehek pabendî rênimayiyan nebe û lîsteya xwarinên xwe bi Kurdî pêşkêş neke dê bê girtin.

Ji çend roj beriya niha ve komîteyên ser bi Qaymeqamiya Hewlêrê ve kempîneke berfireh ji bo kontrolkirina kafe û xwaringehên sînorê qezayê dane destpêkirin û paqijî û nirxên xwarinan û herwiha lîsteya xwarinên restorantan kontrol dikin.

Nebez Ebdulhemîd, Qaymeqamê Hewlêrê derbarê vê yekê de ji Rûdawê re ragihand, “armanca me ev e dema xelk serdana xwaringehan dikin, hem xwarineke paqij bixwin û hem ji nirx û kalîteya xwarinan razî bin, lewma berdewam komîteyên me çavdêriya xwaringeh û kafeyan dikin.”

Qaymeqamê Hewlêrê herwiha diyar kir, pêwîst e lîsteyên xwarinê yên hemû kafe û xwaringehan bi zimanê Kurdî hebe û navê xwarinan bi Kurdî di lîsteyan de bên nivîsandin û tekez kir “Parastina zimanê Kurdî ji bo me pir girign e, lewma em hemû restorantan pabend dikin bi wê yekê ku zimanê Kurdî di lîsteya xwarinên wan de hebe, û eger her restorantek pabendî vê biryarê nebe, dê piştî agahdarkirinê bê girtin.”

Bi gotina Nebez Ebdulhemîd, heftane çend cih û xwaringeh ji ber pabendnebûna bi rênimayiyan tên girtin. Wî diyar kir, “Heftiya bihorî jî 10 xwaringeh û kafe ji ber pabendbûna bi paqijiyê, nebûna lîsteya xwarinan bi zimanê Kurdî, nebûna rêpêdana fermî û hin sedemên din hatin girtin.”

Qaymeqamê Hewlêrê tekez dike, ew li gor qanûnê tevdigerin û ew xwaringeh û kafeyên ku pabendî biryar û rênimayiyan nabin, ji bilî girtinê dê bi cezayên darayî jî bêne sizadan.