Li Mêrdîn û Colemêrgê 3 dever hatin kerentînekirin
Niştecihên gundê Alekan ê navçeya Gevera Colemêrgê, ji ber egera belavbûna vîrusa koronayê ya cureya nû (Covid-19) bixwe gundên xwe xistin kerentînê. Herwiha li navçeya Dêrik a Mêrdînê jî ji ber koronayê taxek û mezrayek hatin kerentînekirin.
Navenda Nûçeyan - Niştecihên gundê Alekanê ku 15 kîlometreyan dûrî navenda Geverê ye, ji bo xweparastina ji koronayê li ser tabelyekê nivîsandin “ji ber Covid-19 têketin û derketina ji gund qedexe ye” û ew tabele li têketina gund danîn.
Herwiha xelkê gund, rêyên gund girtin û otomobîlên ku diçin gund jî paşve vedigerînin û li ser rê, dor bi dor nobetê digrin.
Niştecihê gund Mehmet Selîm Han got: “Hinek kes ji bo avê, hatin û çûyînê dikin. Me jî weke bergirî bi borîyan av heta dervey gund kişand û dikarin ji wê derê ava xwe dagirin. Rast e, em nikarin bi temamî rê li ber vîrusê bigrin, lê em jî bergirîyên xwe dikin.”
Li Mêrdînê taxek û mezrayek hat kerentînekirin
Ji alîyê din ve li navçeya Dêrika Çîyayêmazî ya Mêrdinê jî ji ber koronayê weke tedbîr taxek û mezrayek hatin kerentînekirin.
Walîtîya Mêrdînê ragihand ku li taxa Kovalîyê û mezraya ser bi vê taxê ve Tepecik ji bo xweparastina ji koronayê weke tedbîr heta biryareke duyemîn têketin û derketina wan hatîye sînordarkirin.
NÛÇEYE ŞÎROVE BIKE
JI kerema xwe re şîroveyên xwe jî bi gramera kurdî ya rast û tîpên kurdî binivîsin