Dema Parlamenterê Partiya Demokratîk a Gelan (HDP) yê Amedê Îmam Taşçier di dema hevdîtinên budçeyê yên li Lijneya Giştî ya Parlamentoyê de xwest hemû axaftina xwe bi kurdî bike, Alîkarê Serokê Giştî yê CHP'ê Haydar Akar mîkrofona xwe vemirand û destûr neda.

Parlamenterê HDPê Amedê Îmam Taşçier roja Sêşembê li Lijneya Giştî ya Parlamentoya Tirkiyê bi Kurdî dest bi axaftina xwe ya li ser budçeya sala 2023an a Tirkiyê kir, lê Cîgirê Serokê Parlamentoyê rê neda Taşçier.

Axaftina wî qût kir û jê xwest ku di çarçoveya maddeya 66 a peyrewa navxwe ya parlamentoyê de bi Tirkî biaxive.

Cîgirê Serokê Parlamentoya Tirkiyê Haydar Akar got: “Parlamenterên birêz, zimanê her kesekî yê dayikê heye. Zimanê min jî yê dayikê heye. Ji ser kursî dema ez jî bi zimanê dayika xwe biaxivim ti parlamenterek li vir ji min fam nake. Zimanê dayîkê yê cuda yê gelek hevalan hene. Ji bo em hemû fam bikin ez daxwazê ji we dikim ku bi zimanê me yê fermî yê Tirkî biaxivin. Dikare peyvek dû peyvan bibêje, lê nabe hemû axaftina xwe bi Kurdî bike.”

Ev helwêsta Cîgirê Serokê Parlamentoya Tirkiyê li beramber Kurdî di nav parlamenterên HDPê de bû sedema nerazîbûnê.

Wekîla Serokê Fraksiyona HDPê Meral Daniş Beştaş jî got: “Birêz serok em li heman peyrewa navxwe dinêrin, maddeya 66 a peyrewa navxwe nabejê bi Kurdî nayê axaftin. Derbarê Kurdî de ti serrastkirinek nîne. Hûn bi pêdagirî dibêjin zimanê fermî, em zimanê fermî red nakin, em hemû Tirkî dizanin. Jixwe ne mimkun e li dibistanan ji bilî Tirkî zimanekî din bê xwendin. We bi vê helwêsta xwe, bêtehemuliya xwe ya li hember Kurdî nîşan da.”

Ev nîqaşên li ser axaftina Kurdî li Parlamentoya Tirkiyê di demekê de ne ku li Bakurê Kurdistanê û Tirkiyê zêdeyî 20 milyon Kurd hene, lê hê jî zimanê wan wek zimanek fermî ji aliyê Tirkiyê ve nehatiye qebûlkirin û ji mafê perwerdeya bi zimanê dayikê bêbeş in. Herwiha axaftinên ku bi Kurdî li parlamentoya wî welatî tên kirin jî piraniya caran an wek zimanekî “nayê zanîn” an jî bi sembolekê derbasî girtenameyên fermî yên parlamentoyê dibe.