Navenda Nûçeyan- Êrîşên qirkirinê yên dewleta tirk a dagirker û çeteyên wê yên li dijî rojavayê Kurdistanê didomin. Êrîşên dagirkeran li gelek deverên cîhanê bi çalakîyên cuda tên şermezarkirin. Di vê çarçoveyê de li paytexta Almanyayê Berlînê jî bi pêşangeheke wêneyan a li pêşîya Parlamentoya Almanya ya Federal çalakîyek hate lidarxistin.

Çalakî bi tevlêbûna 12 hunermendên wênesaz ên ji rojavayê Kurdistanê saet di 11:00’an de li pêşîya parlamentoyê destpê kir. Turîst û almanan eleqeyeke zêde nîşanî çalakîyê da. Koma hunermendên rojavayî yên ji Meryem Ayşo, Wehîd Tewfîq, Nesrîn Bayam, Xidir Evdilkerîm, Rodî Xelîl, Şîrîn Dawûd, Kewa Katsîkats, Taha Zalî, Arî Mîrza, Hesen Hûîssen, Hasan Mala û Keçî Xom pêk dihat li pêşîya parlamentoyê bi giştî 9 tablo çêkirin û pêkanînên rejîma Erdogan a li ser gelan xêz kirin.

Hunermendan li dor pankarta ‘Dewleta tirk û çeteyên wê bila ji Bakur û Rojhilatê Sûrîyeyê bi cehimin’ hunerên xwe pêşkêş kirin. Hunermendan 9 tabloyên ku sûcên şer ên dewleta tirk bi çekên kîmyewî bikar anî temam kirin.

PYD Berlîn û Civaka Îslamî ya Kurdistanê (CÎK) jî piştgirî dan çalakîyê. Hunermendan bi daxuyanîyeke hevpar anî ziman ku nerazîbûnên xwe bi rêya hunerê vegotin û ji niha û şûnde jî dê çalakîyên xwe bidomînin. 

Çavkanî: E-rojname