Hêzên Hevpeymaniya Navdewletî û Hêzên Sûriyeya Demokratîk (HSD) li Rojavayê Kurdistanê û herêmên din ên di bin kontrola HSDê de ji nû ve dest bi gerên hevpar ên leşkerî kirin.

Artêşa Tirkiyê ji 20ê Mijdara 2022an ve operasyoneke nû bo ser Rojavayê Kurdistanê dest pê kir û navçeyên di bin kontrola Hêzên Sûriyeya Demorkatîk (HSD) û Rêveberiya Xweser de bombebaran û topbaran kirin.

Ji ber wan êrîşên Tirkiyê, HSDê biryar da ku gerên xwe yên hevbeş ên bi Hevpeymaniya Navdewletî re rawestîne û bala xwe bide ser deverên sînorî yên di bin kontrola wê de û deverên di bin kontrola hêzên opozîsyona Sûriyê yên nêzîkî Tirkiyê de, wek Girê Spî.

Lê hêzên Hêzên Hevpeymaniya Navdewletî îro dîsa ji baregeha xwe ya li Rimêlan a Rojavayê Kurdistanê dest bi gera xwe ya leşkerî kirin û otomobîlên HSDê jî bi wan re bûn.

Her wiha hat destnîşankirin ku gera hevbeş a Hevpeymaniya Navdewletî û HSDê li parêzgeha Dêre Zorê jî birêve çûye.

Armanca gerên hevbeş parastina aramiyê li herêmê û rûbirûbûna metirsiya şaneyên razayî yên DAIŞê ye.

Berpirsekî pilebilind ê HSDê diyar kir ku gerên hevbeş ên hêzên Hevpeymaniya Navdewletî û şervanan piştî ku bombebarana li ser deverên di bin kontrola HSDê de kêm bû dîsa dest pê kirin.

Berî destpêkirina bombebaran û topbarana Tirkiyê, heftane nêzîkî 20 gerên hevbeş di navbera hêzên Hevpeymaniya Navdewletî û HSDê de dihatin kirin.

Li Rojavayê Kurdistanê û deverên din ên di bin kontrola HSDê û li herêma Tenefê de, nêzîkî 900 leşker û şêwirmendên leşkerî yên Amerîkayê hene.

Pentagonê çendîn caran ragihandiye ku armanca wan a sereke ya mayîna li Rojavayê Kurdistanê û Sûriyê şerê bi DAIŞê re ye.