Li gundewarê Eyn Îsa li herêma Firatê ya Rojavayê Kurdistanê mînek bi 4 zarokan de teqiya û di encamê de 2 zarokan canê xwe ji dest dan.

Li gor zanyariyên ji Rojavayê Kurdistanê ve, îro Înê li nêzîk gundê Ebû Sira yê girêdayî bajarokê Eyn Îsa, mînek bi 4 zarokan ve ku li ber pezên xwe bûne, teqiyaye.

Çavkaniyên xwecihî belav kirine, di encama teqînê de 2 zarokan jiyana xwe ji dest dane û 2 zarokên din jî birîndar bûne.

Zarokên birîndar ji bo dermankirinê rakirine nexweşxaneya bajarokê Eyn Îsa.

Ew di demekê de ye, ku di van rojên dawiyê de artêşa Tirkiyê û komên çekdarên topbaran û êrîşên xwe li gundewarê bakurê Eyn Îsayê zêdetir kirine.

Hêzên Sûriyeya Demokratîk (HSD) ragihandiye, ku roja Çarşemê hêzên wan êrîşeke berfireh a komên çekdar ên ser bi Tirkiyê ve bo ser gundê el Malikî li bakurê Eyn Îsa têk birine, ku di encamê de 18 çekdar hatine kuştin.

Bi gotina HSDê, serkirdeyekî DAIŞê yê berê yê bi navê Ismaîl el Îdo jî di nava çekdarên kuştî de ye.

HSDê diyar kiriye, ku di vî şerî de 4 kes ji şervanên wan jî birîndar bûne.