Navenda Nûçeyan - Zehmatîya jîyanê dihêle ku mirov bê çare bimîne, ev hemî ajovanên teksîyan e, ji sibehê hetta êvarî kar dikin û nikarin pêdivîyên malên xwe peyda bikin. Di raporteke Kurdistan24ê de hemwelatî dibêjin her tişt buha bûye, lê hîn kirîya teksîyan wekî berê ye, temenê parçeyên otombîlan gelekî bilind bûye û kireya her siwarekî nêzî nîv sêntî ye, ji ber wilo ev ajovan doza bilindkirina kirê û çareserîyekê ji rewşa xwe re dikin.

Her kes van gazinan dike û firincîyê bi navê Ehmed xwedî firneyekê li bajarê Qamişlo ye, karê xwe sekinandîye ji ber ku temenê çewalê ard bûye 10 qat û nirxê nan hîn wekî xwe ye, Ehmed dibêje ku li gorî nirxê dolar nema dizane her nanekî bi çiqasî bifroşe û eger rewş wiha bimîne dê firneya xwe bi temamî bigre.

Rewşa hemî bazarê wiha ye, kirîn û firotinrawestîya ye û gelek dikan û market dergehên xwe girtine, xelk gelek gazinan dikin û çare jî ji wan re nayê dîtin, hin abûrînas dibêjin ku ev nîşana pêlek birçîbûnê ye ku bi ser deverê were.