Li navçeya Siwêreg a Bakurê Kurdistanê di çarçoveya têkoşîna li hemper Coronayê de tîmên derziyê yên mobîl hatin avakirin û ew bi taybetî li deverên gundnîşîn bi Tirkî, Kurmancî û Zazakî bang dikin da ku xelk derziya Coronayê li xwe bidin.

Di çarçoveya xebatên derzîkirinê de ku Rêvebiriya Tendurustiyê ya Navçeya Siwêregê birêve dibe, tîmên derziyê yên mobîl hatin avakirin û ew ji bo welatiyên li derveyî navenda bajar û navçeyê dijîn û nikarin derziyê li xwe bidin, dixebitin.

Tîmên tendirûstiyê ji aliyekî ve derziya welatiyan li wan didin û ji aliyê din ve jî ji bo welatî bikaribin ji vê xizmeta sûd werbigrin bi Tirkî, Kurmancî û Zazakî bang dikin.

Li gor Wezareta Tendirustiya Tirkiyê, parêzgehên Bakurê Kurdistanê bi giştî di rêzên dawî yên wergirtina vaksîna Covid-19 de cih girtine.

Rêjeya herî kêm a wergirtina vaksînê li Bedlîsê û piştre jî Sêrt, Riha, Mêrdîn, Amed, Mûş, Êlih, Çewlîg, Îdir û Şirnex tên, ku rêjeya vaksînkirinê li wan parêzgehan ji sedî 32.6 ye.